Armas, balbala, nakumpiska iti nasukisok a balay

SANTIAGO, Ilocos Sur – Uppat a paltog ken nasurok a sangagasut a bala ti nakumpiska dagiti polis iti balay ti maysa a residente iti Barangay Ulo-ulo ditoy nga ili idi agsapa ti Oktubre 12.

Sinukisok ti nagtipon nga elemento ti ISCIDT nga indauluan ni PCI Arbel Castro Merculio, Provincial Public Safety Company nga indauluan ni Police Supt. Hombrebueno Reyes ti balay ni Rodrigo Fontanilla Sr. y Caransa, residente iti nadakamat a barangay, ket nakakumpiskada iti maysa a cal 45 pistol (colt Mk 4 series 80), maysa a 22 revolver (homemade), maysa a 12 gauge shotgun (Akkar) ken maysa a cal 9mm pistol (Daewoo), maysa a magasin para cal 45, 7 a bala para cal 45, 4 bala para cal 22, 24 bala para 12 gauge shotgun ken 94 bala para cal 9mm, ken 3 a magasin para cal 9 mm pistol.

Mapapati nga awan ti lisensia a naipakita ni Fontanilla para iti cal 45 ken homemade 22 revolver idinto nga adda lisensiana iti 12 gauge shotgun ken cal 9 mm pistol.

Imet dagiti nagsukisok ti search warrant a pinirmaan ni Judge Francisco Ante, Sr. ti MCTC,Vigan City.

Naipan ti suspek agraman dagiti nakumpiska a paltog ken balbala iti Candon City police station para iti dokumentasion ken disposisionda.#