Footer

Arsobispo Salgado, dadduma pay, napadayawan gapu iti natalna, naurnos nga eleksion

BANTAY, Ilocos Sur – Gapu iti naitulongda iti pannakaisayangkat iti naurnos ken natalna nga eleksion iti Ilocos Sur idi Mayo 10, 2010, pinadayawan ti Police Regional Office-1 ti sumagmamano a dadaulo ditoy probinsia a pakairamanan ti Simbaan, polis ken militar iti Camp Elpidio Quirino, Bulag, ditoy nga ili itay Hunio 18.

Karaman kadagiti pinadayawan ti PPO1 babaen ken ni Regional Director Police Chief Supt. Constante D. Azares, Jr. da  Archbishop ti Nueva Segovia Ernesto Salgado, Ilocos Sur Comelec Supervisor Atty. Marino Salas, Sister Lilian Carranza ti Parish Pastoral Council for Responsible Voting (PPCRV)-Ilocos Sur ken Col. Rogelio Migote ti 50th Infantry Brigade-Philippine Army iti simple a seremonia a naangay iti provincial police headquarters ditoy nga ili.

Napadayawan pay dagiti lima a commissioned police officers a pakaibilangan da Supt. Cornelio Comila ti ISPPO investigation section, Panfilo Racho ti intelligence unit, Emannuel Reyes ti Ilocos Sur Police Support Management Company, Supt. Marlou Castillo, hepe ti polis ti Candon PNP, ken PCI Christopher Rebujio ken dagiti non-commissioned officers a pakairamanan da SPO2 Conrado Azures, PO3 Rene Wakisan, SPO3 Venancio Berdadero, PO3 Roderick Sumabat ken SPO1 Elmer Cabanglan.

Naigiddan ti pannakaiyawat dagiti pammadayaw iti ibibisita ni Azares iti police provincial office ditoy. Sakbayna, binisita ni Azares ti Ilocos Norte provincial police office.#