Arsobispo ti Nueva Segovia, kinondenarna mapaspasamak nga extrajudicial killings

VIGAN CITY – Uray ti dadaulo ti Arkidioses ti Nueva Segovia, imbatadna ti panangkondenarna iti mapaspasamak nga extrajudicial killings iti pagilian.

Kas inreport ti Bombo Radyo Vigan itay nabiit, iti panangkondenar ni Arsobispo ti Nueva Segovia Rev. Fr. Marlo Mendoza Peralta iti EJK, kinunana a no nagbasol man ti maysa a tao, rumbeng laeng a madusa a saan ketdi a mapapatay.

Nagpaiwaras pay ni Arsobispo Peralta kadagiti amin a parokia iti babaenna iti tarpaulin a nakailadawan ti agladladingit nga ina bayat nga arakupna ti awanen biag nga anakna a biktima iti illegal a droga.

Maipalagip nga apaman a nagtakem a provincial director iti Ilocos Sur, simmarungkar ni Senior Supt. Rey A. de Peralta ken ni Arsobispo Peralta a nangkiddawanna iti tulong ti Simbaan iti kampania ti kapolisan maikontra iti illegal a droga.

Inkari ti arsobispo ti itutulongna iti daytoy a kampania ti droga babaen ti pannakaibitin dagiti tarpaulin kadagiti amin a parokia iti probinsia.

Sakbay daytoy, addan dagiti naireport a pammapatay a mapapati nga extrajudicial killings agsipud ta armado a tattao a riding in tandem dagiti nangisayangkat a nagbalin a biktima dagiti nainbolbar iti droga wenno drug personalities.

Kanaig daytoy, indagadag ni Arsobispo Peralta ti panagriing ti publiko, agraman ti gobierno iti mapaspasamak a kinadangkes, agsipud ta no agulimek lattan dagitoy, agpeggad ti masakbayan ti sumaruno a henerasion ta agbalin laengen a normal dagiti mapaspasamak a pammapatay.

Innayon ni Peralta a rumbeng a maipasagepsep ti kinapateg ti biag ti tunggal tao agsipud ta sagut daytoy ti Namarsua ket saan a rumbeng a kettelen lattan ti asinoman.#