Asawa ti konsehala, nainbolbar idin iti droga

SANTIAGO, Ilocos Sur – Saan a palimed kadagiti agtuturay ditoy ti illegal nga aktibidad ti asawa ti maysa a sangguniang bayan member a nakakumpiskaan dagiti polis iti mapapati a droga bayat ti insayangkatda a panagsukisok iti balay daytoy idi Agosto 29.

Iti interbiona ken ni Jun Ramos, anchorman ti Barangay Commando a naipatangatang iti DWRS idi Septiembre 3, impalgak ni Mayor Joselito Miranda a natiliw ken nabalud idin ni  Renato Tengsico y Collado, 66, asawa ni SBM Lilia Tengsico, mainaig met laeng iti mapapati a droga.

Segun ken ni Miranda, isu koma pay idi ti mangkuyog ken ni Tengsico a dumatag ken ni Gov. Luis “Chavit” Singson ket nagur-uray ngem saan a nagparang daytoy.

Kinuna ni Miranda nga iti sumuno nga aldaw ti isusuko ni Tengsiko ken ni Singson ngem isu metten ti panangaresto kenkuana dagiti polis.

Kinuna ni Miranda a kalpasan ti panagpiansa ni Tengsico para iti temporario a pannakawayawayana, timmalna daytoy.

“…iti panagkitami, saanen nga agsubli pay iti illegal nga aktibidadna nga agikut iti droga…” kinuna ni Miranda ngem “…kadagitoy naud-udi nga aldaw… nangruna idi sakbay ti eleksion (2013 May elections), nariknami a nagsubli manen daytoy iti sigud a trabahona.”

Positibo ti panagsukisok dagiti joint elements ti ISPAIDSOTG nga indauluan ni Police Chief Inspector Sozimo R. Racho, PDEA ISSET iti panangidaulo ni Intelligence Officer 3 Darnel Libao Bacate, ken polis-Santiago nga indauluan ni Police Senior Inspector Roderick A. Vintero iti babaen ti direkta a superbision ni Police Senior Supt. Jemar Delgado Modequillo, OIC, ISPPO iti balay ni Tengsico idi agarup 4:30 ti malem ti Agosto 29 a nakakumpiskaan dagiti otoridad iti uppat a a pedaso ti nadumaduma ti kadakkelda  a heat-sealed plastic sachet a naglaon iti mapapati a shabu a mapattapatta nga agdagsen iti  sumurok kumurang 10 grams ken ag-balor iti P70,000.00, nagawangan a sachet a mapapati a naglaon iti shabu residue, ken nadumaduma a drug paraphernalia a pakaibilangan ti 2 nga improvised tooter, 6 improvised foil tooter, aluminum foil, sachet a maaramat iti repacking, ken sensilio iti nadumaduma a denominasion, ken selpon.

Imet dagiti otoridad ti search warrant nga inyisio ni Judge Sixto D. Diompoc ti RTC Branch 72, Narvacan, Ilocos Sur idi napanda sinukisok ti balay ni Tengsico.

Innayon ni Miranda nga ammona a maawat ti pamilia ni Tengsico ti pannakatiliwna kalpasan ti pannakakumpiskar kadagiti mapapati a droga iti balayda bayat ti search operations nga insayangkat dagiti polis.

“… ammok nga uray pay nasakit ti nakemda (asawa ken anak ni Tengsico) mabalin a maakseptarda ta ammoda met a daytoy a banag ket  illegal a mapaspasamak…” kinuna ni Miranda.#