Asawa ti mapukpukaw a mangngalap, di pay naawanan namnama a sibibiag pay daytoy

CABUGAO, Ilocos Sur – Di pay nabirokan ti maysa a mangngalap a taga-Barangay Sabang ditoy nga ili a nagpukaw iti taaw nakurang a dua a lawasen ti napalabas.

Ngem kinuna ni Buenafe Alzate, asawa ni Eliseo, ti mapukpukaw a mangngalap, a saan pay a napukaw ti namnamana a sibibiag pay ti lakayna.

“Saan pay a napukaw ti namnamak a sibibiag pay ti asawak ket sumangpetto met laeng,” kinuna ni Buenafe bayat ti interbio kenkuana ni Jun Ramos, anchor ti Barangay Commando-Brigada a naipatangatang iti radio idi Abril 7.

Iti immun-una nga interbio ti DWRS ken ni Edito, kabsat ni Eliseo, kinunana a sakbay ti panagpukawna, nagpataaw tapno agala iti pusit ti amana ken ni Eliseo ngem nasapada a naggawid iti parbangon ti  Marso 28 ta nadawel ti taaw.

Kinuna ni Edito a nagsubli ni Eliseo iti taaw iti agsapa met laeng ti Marso 28 tapno mapanna kitaen ti ramada iti baet ti panangiballakadna a saanen nga agtuloy gapu ta “nagaraw ti danum”.

Saanen a naggawid ni Eliseo manipud idi.

Mapapati a napattog ti bangkana bayat ti kaaddana iti taaw gapu iti dadakkel a dalluyon.

Nasarakan dagiti napan nagbirok kenkuana ti pagbalonanna iti danum iti asideg ti rama ngem dida nasarakan ti bilog ken ti mangngalap.

Napan pay nagbirok ti pamilia ken kakabagianna kadagiti lugar a namnamaenda a nakaisadsadanna ngem dida nasapulan ti mapukpukaw a mangngalap agraman ti bilogna.

Segun ken ni Edito, kabsat ni Eliseo, daytoy ti maikadua a pannakaitawtaw ti bilog ngem sabali idi ti naglugan. Nasarakan ti bilog iti partena ti Bio, Tagudin.

Linagidaw ni Edito ti kaadda dagiti agipatpatulod kadakuada iti palso a damag maipapan iti nagpukaw a kabsatna.

“Kadagiti manglokloko nga agipatpatulod iti text kadakami, makonsensiakayo koma…,” kinuna ni Edito.

Innayon ni Edito a naawatdan a natayen ti kabsatna iti dayta a kabayagen nga awanen ti pakadamaganda kenkuana, ket  patpatibkerenda ti pakinakem ni Buenafe nga “awatenna a natayen ti asawana.”

Ngem kinuna ni Buenafe a di pay napukaw ti namnamana a sumangpet ti lakayna, sana innayon a no natayen ti asawana, nagparikna koman kenkuana wenno natagtagainepna koman.

Kabayatanna, nabirokan met laengen dagiti tallo a mangngalap a taga-Barangay Gabao, Santiago, Ilocos Sur a naireport a napukaw iti taaw manipud pay idi Abril 5.

Naammuan a nasarakan da Harold Ramboanga, Arnel Romero, Jr. ken Bermar Etrata nga agtatapaw iti kabaybayan a sakup ti Puro, Magsingal, Ilocos Sur idi agarup alas 10 ti bigat ti Abril 7 kalpasan ti maysa a rabii ken dua nga aldaw a panagkatangkatangda iti taaw.

Segun dagiti mangngalap, naitupa ti bilogda iti rakit a naiparnged iti rama a puon ti nakabutawan ti luganda ken nakaarinebnebanna.

Ti pasaplak ti bilog ti inaramat a pataw dagiti mangngalap ngem ingguyod ida ti napigsa a koriente ti danum agingga a dimmanonda iti parte ti Barangay Puro a nakasalawan ida ni Hector Torricer, 36, mangngalap a taga-Puro, Magsingal.

Iti pannakaisurat daytoy, nakaawiden dagiti mangngalap iti Barangay Gabao.#