Aso, nagpakdaar nga adda dakes a napasamak iti amona

SANTA, Ilocos Sur – Naminsan pay a napaneknekan a maysa a naimbag a gayyem ti aso.

Iti daytoy a gundaway, pinakdaaran ti aso ti pamilia ti amona nga adda dakes a napasamak daytoy iti ipapanna panagkalap iti karayan ket kasapulanna ti arayat.

Immarayat ti kabsat ti biktima ngem idi alawenda daytoy,  awanen ti biagna.

Segun ken ni Roberto Bañez y Pita, 54, baro, napaliiwna idi agarup alas 5:00 ti malem ti aso ti kabsatna a naggawid a maymaysa ken saan a makatalna ken taul a taul.

Sakbayna, iti agarup alas 5:00 ti bigat ti Enero 9, nagturong iti Abra river tapno agkalap ni Rogelio Bañez y Pita, 52, baro, pukol ti kannigid a sakana, residente iti Barangay Sacuyya ditoy nga ili.

Kinuna ni Roberto a nagsuspetsa gapu iti panagtaul-taul ti aso ni Rogelio ket sinurotna daytoy iti karayan ket ditoy a nakitana laengen a tumtumpaw ti bagi daytoy iti danum.

Naipan ti biktima iti St. Stephen Funeral Homes iti San Esteban para iti pannakautopsiana.

Mapapati a naikaglis ti biktima a puon ti nakaipisokanna iti karayan.

Kabayatanna, maysa a karpintero ti nalmes bayat ti mapapati a panagdigosna iti Karayan Buaya iti Barangay Ubbog, Salcedo, Ilocos Sur idi malem ti Enero 9.

Iti inisial nga inbestigasion dagiti polis, sakbay ti insidente, naggiinom da Noel Cadlaon y Lazaro, 51, naasawaan, karpintero, residente iti Barangay Balidbid, ti kayongna a ni Rolando Mangay-ayam, 32; ken ni Robert Cabarios y Garnace, 53, naasawaan, kalugaran ti biktima sada napan iti karayan tapno agdigos ken ituloyda ti aginom.

Idi agarup alas 11:00 ti bigat, inawis da Mangay-ayam ken ni Cabarios ti biktima nga aggawiden ngem nagbati daytoy nga aglanglangoy ken agkankanta iti karayan.

Segun kadagiti sumagmamano a napan nagdigos iti karayan iti tengnga ti aldaw, nakitada ti biktima nga aglanglangoy ken agkankanta iti karayan.

Idi ala una iti dayta met laeng a malem, napan nagdigos da Freddie Bang-asan ken ni Omit Bagsingit, residente ti Barangay Ubbog ket nakitada ni Cadlaon a nalmesen.

Inarayatda ti biktima sada intaray iti Salcedo District Hospital ngem naideklara a natayen daytoy.#