Atake iti puso nakatayan tripolante ti naisadsad a barko

CANDON CITY – Atake iti puso ti nakatayan ti tripolante ti Singaporean ship a naisadsad iti kabaybayan ti nagbeddengan ti Sta. Lucia ken daytoy siudad idi Hulio 18, daytoy ti report manipud iti commander ti coast guard a nakabase ditoy siudad.

Kinuna ni Petty Officer First Class Pulmino Sion, commander ti coast guard Candon sub-station, a natay gapu iti atake iti puso bayat ti yaallatiwda iti tug-boat ni Henry Canon Libo-on, chief mate iti naisadsad a Singaporean ship steel bulk carrier “Alam Manis” a nagkarga iti nickel ore idi naisadsad.

Segun iti report, pasig a Filipino dagiti 21 a tripolante ti nasao a barko a pakaibilangan ni Master Chief, Capt. Orlando Oñosa Cabalatongan, taga-Talisay, Negros Occidental.

Nailugan dagiti tripolante agraman ti biktima iti Salviscount tug-boat a napan iti Poro Port, City of San Fernando, La Union.

Iti kaudian a report, addan ti naisadsad a barko iti sumurok-kumurang 1.32 kilometro manipud iti igid ti baybay.#