Atleta ti Ilocos Sur, tallo lawas nga agsanayda

CABUGAO, Ilocos Sur – Kas paset ti panagsaganada a makisalip iti Region 1 Athletic Association (RIAA) meet, tallo lawas nga agsanay dagiti atleta iti Division of Ilocos Sur kadagiti sports facilities ditoy nga ili.

Aramaten dagiti atleta iti panagsanayda dagiti sports facilities ditoy a pakaibilangan ti Cabugao District Athletic Oval, Cabugao Cultural and Sports Complex, Barangay Bonifacio covered courts ken ti Cabugao Central Park a pagsanayanda iti basketbol.

Idauluan ni PESS Ilocos Sur Division Coordinator Meneleo Palma, makisalip dagiti atleta ti Division of Ilocos Sur iti archery, arnis, athletics, badminton, baseball, basketball, boxing, chess, football (soccer), gymnastics, lawn tennis, sepak takraw, softball, table tennis, taekwondo, ken volleyball .

Makipartisipar met iti nasao a paay-ayam a maangay iti Pangasinan inton Pebrero 15-21, 2015 dagiti atleta ti Vigan City Division ken Candon City Division.#