ATM machine, pinadas a takawan dagiti mannanakaw

SANTA, Ilocos Sur – Maysa nga ATM machine ti maysa a bangko a naikabil iti sango ti Santa Public Market ditoy ti naireport a pinadas a takawan dagiti mannanakaw idi malem ti Nobiembre 2.

Maysa a Karen Ann Tadeo y Cabotage, 21, awanan asawa, empleado ti Land Bank, ken residente iti Barangay Quinarayan, Narvacan, Ilocos Sur ti nangireport iti nasao nga insidente a mapapati a naiwayat bayat ti UNDAS a kaadda dagiti tattao iti kamposanto.

Iti panagimbestiga dagiti polis, nasukalanda a naluktan ti akinngato a paset ti makina ngem saan a nabaelan dagiti di nabigbig a suspek a luktan ti akimbaba a paset a nakaikabilan ti vault.

Nakasarak dagiti polis iti metal flat bar iti suli iti nakaikabilan ti ATM machine a mapapati nga inaramat dagiti suspek a panglukat iti makina.

Iti panagsukimat dagiti empleado ken security guards ti Land Bank, naammuan a saan a nagballigi dagiti mannanakaw a nangtakaw iti kuarta a linaon ti nasao nga ATM machine.#