Atty. Benjamin M. Pascual ken Manuel A. Viray: Ti Aramid A Kas Tugot Iti Panawen (Maudi a paset)

Saanen a ti daniw ti naidulin no di ket ti epekto dayta a daniw iti barukongtayo. Nalabit, wen, kunaenta laengen a nairayo la ngata datao kadayta nga ilala, ngem no usigen a nalaing, saan laengen a maipapan dagiti sinurat ni Manuel A. Viray ken dagiti koleksionna kadagiti nadumaduma pay a sinurat ti nakaiturongan ti daniw no di ket aminen a mannurat iti agdama a panawen.

Idi nabasatayo ti daniw ni Atty. Benjamin M. Pascual limitado ti ammotayo iti kinaasino ni Manuel A. Viray a madakdakamat iti daniw. Ngem kinuldit ti daniw ‘toy pusok ket naidulin iti kaunggak dayta a kuldit a kas apros ti panangilala a kas iti panangilala ni Atty. Benjamin M. Pascual kadagiti libro ni Manuel A. Viray.

Maysa a diplomatiko ni Manuel A. Viray (1917-1995)  – nagserserbi iti gobierno ken kanayon a maidestino iti sabsabali a pagilian. Maysa a literary critic, poet, historian ken short-story writer. Editor-in-chief ti Archipelago Quarterly.

Idi laeng tumapog iti katengngaan ti dekada 2000 a nasagangko ti kinaasino ni Manuel A. Viray babaen ti saritana a “Portrait of a Great Man” a mabasa iti http://www.sushidog.com/bpss/stories/great_man.htm website. Itoy a saritana, natibong ti ikkis kontra iti burokrasia, nepotismo ken kinalabes nga addang wenno isisiasi iti umno a dana dagiti agserserbi iti gobierno – ti panagserbi ket saanen a para iti irarang-ay ti ili no di ket para iti ilulukmeg ti bagi. Am-ammo ti nagan ni Manuel A. Viray iti literatura  a kas maysa kadagiti postwar writers wenno kalpasan ti Maikadua a Gubat Sangalubongan. Addan sa sumag-iinnem a librona a pasig a nasurat iti English ken koleksionna kadagiti dadduma a sinurat nga inlibrona a kas editor. Dua kadagiti librona ti nairuar idi 1940s, iti 1960s ken pakpakauna ti 1990s sakbay ti ipupusayna. Pattapattaek a dagitoy a libro siguro ti nasarakan idi ni Atty. Benjamin M. Pascual a nakadisley ken mailaklako iti bangketa – saan nga iti bookstore!

Aya, unayen, dungngo, kastoy la kadin ti pagbanagan ti gapuanan ni mannurat, dinamdamag ni Atty. Benjamin M. Pascual iti bagina idi nasarakanna dagita a libro ni Manuel A. Viray. Dagiti libro a kasla agur-urayda iti mangipateg ken mangilala kadakuada isu nga addada iti sab-ok ti bangketa. Kas maysa a mannurat, ginatang amin ti abogado dagita a libro ni Manuel A. Viray ket binag-oynan nga inyawid, ta kas nasaona iti daniwna, isun ti ‘mangipateg’ kadagita a libro. Ti inaramid ni Atty. Benjamin M. Pascual ket aramid a natakneng ta naikitikit pay iti barukongtayo a saanto a pulos a mapunas iti kaanoman.

Ta asino pay ti mangipateg kadagiti gapuanan ni mannurat no di met laeng dagiti padana a mannurat? Dagiti agessem iti panagsuratan ti mangilala ken mangipatpateg kadagiti sinurat.

Kas mannurat ken agan-analisar kadagiti sinurat, makapasainnek la unay dayta a daniw ni Atty. Benjamin M. Pascual, ta nalabit a kastanto met pagbanagan dagiti sinurat dagiti dadduma a mannurat no di man kaaduan a mannurat iti agdama a panawen – nga agtinnagdanto laengen iti bangketa nga agsapul ken aguray iti mangipateg kadakuada.

Iti agdama a panawen a nabayagen a nagretiro ti makinilia, saan laengen nga iti bangketa ti pakaigabsuonan kadagiti sinurat a pagurayanda iti mangisakit ken mangilala kadakuada no di pay ket masarakan idan kadagiti kalkalsada iti cyber highway. Ibati dagiti mannurat kadagitoy a luglugar ti nanumo a gapuananda a kas tanda ti ilalabasda met itoy a biag. Dagiti sinuratda ti ibatida a tugotda.

Ta sadino pay koma ti pangibatian kadagiti tugot?

No ipategto ti sumarsaruno a kaputotan dagitoy wenno saan, saanen nga isu ti napateg (ken ni mannurat) no di ket umanayen nga iti ilalabasna itoy a biag ket adda imbatina a tugot – dagiti tugotna iti panawenna.#