Atty. Benjamin M. Pascual ken Manuel A. Viray: Ti Aramid A Kas Tugot Iti Panawen (Umuna a paset)

NI JAIME M. AGPALO, JR.

Saan a dagiti nababaknang ken agkakaimas a taraon ken nangingina ti balorna nga agkakapintas ken makaay-ayo a material a banag nga impaay, imparanud wenno imparangkapmo iti asinoman, lalona unay kadagiti ubbing ti pakalaglagipanda kenka no di ti aramidmo a naimula iti barukongda. Saan ngamin a mapunas daytoy iti kaanoman kabayatan ti panaglabas ti panawen.

Saanen a nasken no naigagara man wenno saan dayta nga aramid. Nasnasken ti marikrikna ti nakaaramidan wenno immallawat kadayta a banag.

Aramid a napateg unay kadakuada nga immallawat ta namulida a kas mangitandudo iti kinapudno, kinatakneng ken kinalinteg. Aramid a nangriing ti kaungganda iti maysa a napateg a kinapudno a nasken la unay nga ilalaenda ken ipateg iti tungpal biagda. Aramid a nasken a taginayonenda ken iyallatiw met kadagiti annakda ken iti amin a sumarsaruno a kaputotan.

Ti aramid, mabalin nga iti aktual a gunay wenno nailadawan wenno inladawan. Ti aramid a nailadawan ket isuda dagiti ladawan ti biag a masakdo manipud iti ubbog ti arte – nagduduma dagiti arte, ngem agsaoak laeng maipapan iti arte ti literatura.

No maminsan, mabalin a saan unay a napateg ti maysa nga aramid iti mismo a makin-aramid ngem nakapatpateg unay dayta kadagiti immallawat ken nakaimatang kadayta nga aramid.

Isu daytoy ti ababa a pakabuklan daytoy a sinurat.

Ni Atty. Benjamin M. Pascual, ti abogado a mannurat ti Laoag City, Ilocos Norte ti maysa kadagiti mabigbigbig a panuli ti Ilocano literature. Napipintas dagiti sinursuratna a bunga ti panunot a naiyallatiw met laeng kadagiti pampanunot ken iti barukong. Makaited iti inspirasion ken adal iti panagdaliasat iti biag dagiti sinursuratna. Nababaked a taraon iti panunot dagiti sinursuratna a rumbeng nga ikutan ken saluadan ti asinoman. Dagiti pay sinuratna ti nagadawan toy numo tapno nalawlawa ti paniriganna iti literatura.

Kas mangim-imutektek iti kasasaad ken panagtaray ti gimong babaen ti literatura, adda epekto ti sinuratna a diakto pulos malipatan.

(Dua ti agnagan ti Benjamin Pascual a mannurat nga idolotayo. Ni Benjamin P. Pascual ket nalaing a kuwentista ken nobelista iti Tagalog a nabayag met a sinursurottayo dagiti tugotna babaen kadagiti putarna.Β  Ni Atty. Benjamin M. Pascual ti Ilokano.)

Agsaoak itoy a sinurat iti epekto ti sinurat ni Atty. Benjamin M. Pascual, saan a ti mismo a sinuratna. No dadduma ngamin, malipatanen daydiay sinurat ngem ti imbati a kinapateg wenno mensahe daydiay a sinurat ket saanto a maumag iti kaanoman ta naigamerdan a kas linabag ti biag. Ta kastan sa ti kunada a maysa pay a pudno a kaipapanan dagiti sinurat – saan a daydiay no ania ti binasam no di ket ania ti impaay ti binasam kenka!

Kas ti maysa a daniw ni Atty. Benjamin M. Pascual ti Ilocos Norte nga impablaak ti Bannawag – diak malagipen no ania a dekada a naipablaak. Kinuldit daytoy a daniw β€˜toy pusok ket naidulin iti kaunggak a kas apros ti ilala, kas ti panangilala ni Atty. Benjamin M. Pascual a bugas ti daniwna. Kuldit a kasna la kunaen a mapasamakto met laeng dayta kadagiti mannurat iti sumarsaruno a kaputotan. Isu a kinulding met dayta a panangilala toy pusok a kas mannurat.

Panangilala. Ti panangilala iti aramid ti sabali, ket makuna nga aramid a natakneng ta iladladawanna ti ehemplo a suroten dagiti sumarsaruno a kaputotan. Ti ehemplo nga inladawan ti aramid, saan ket a babaen ti balikas.

Saanen a ti daniw ti naidulin, ti epekto dayta a daniw ti naidulin ken naidalimanek iti barukongtayo.

(Adda tuloyna)