Australian national, natay bayat ti panagpainitna iti Suso beach

STA. MARIA, Ilocos Sur – Saanen a naiyabot iti ospital ti biag ti maysa nga Australiano a dimmagas a napan nagdigos iti kabaybayan iti Barangay Suso ditoy nga ili.

Indeklara ti doktor iti Reyes Clinic and Hospital a natayen ni Laurence Kate Armitage, 66, naasawaan ken esidente iti Block 7 Lote 10, Baurut St., Phase 2, Golden city, Imus, Cavite ken 99 Bright St. Lismore NSW 2480, Australia idi maidanon iti ospital.

Segun iti report manipud iti polis, agpa-Baguio City da Armitage, kaduana ti asawana a ni Marlyn Benevidez, tubo ti Pinili, Ilocos Norte ken sumagmamano a kabagian ti babai, ngem idi malabsanda ti Suso beach, naay-ayo ti biktima a mapan agdigos ket dimmagasda.

Nagpagabur pay ti biktima iti darat bayat ti panagpainitna iti igid ti baybay.

Ngem inakkalda daytoy ken intaray iti ospital idi nadlawda a nakalablabbassit metten.

Mapapati a naatake ti biktima.#