Awan black sand mining iti Ilocos Sur – Gov. Singson

VIGAN CITY – Awan ti maisaysayangkat a panagminas iti black sand iti probinsia ti Ilocos Sur, daytoy ti indeklara ni Gov. Ryan Singson bayat ti programa ti pannakaselebrar ti Environmental Month a naangay iti provincial capitol itay Hunio 19.

“Bilang gobernador ken ama iti probinsia, ideklarak a diak ipalubos nga adda black sand mining iti probinsiatayo nga Ilocos Sur,” kinuna ni Singson.

Innayon ni Singson a saan a panagminas iti black sand ti kaadda dagiti bapor iti kabaybayan a sakup ti Barangay Poro no di gapu iti dredging ti Mestizo River a proyekto ti lokal a gobierno ti Caoayan.

Sakbayna, babaen ti pastoral letter, kinondenar ni Fr. Cosmenio Rosimo ti mapaspasamak a black sand mining iti Caoayan.

Ni Rosimo ti numero uno a kritiko ni Singson sipud pay idi nagtugaw a gobernador iti Ilocos Sur ket maysa a kangrunaan a pangbabbabalawanna iti gobernador ti agtultuloy a pannakaisayangkat ti black sand mining kadagiti sumagmamano a coastal barangays iti probinsia.

Naammuan ti Tawid News a mangisayangkat da Rosimo inton Hunio 22 iti prayer-rally iti mismo a Caoayan a pakipartisiparan dagiti nadumaduma a grupo a pakaibilangan dagiti agtutubo, ken umili a kontra iti black sand mining iti probinsia.

Ngem kinuna ni Singson a sipud pay nagtugaw a gobernador, nabatad ti pagtaktakderanna a saanna nga ipalubos nga adda panagminas iti black sand iti probinsia.

Indawat ti gobernador a siputanda dagiti bapor a nagpundo iti kabaybayan iti ili a Caoayan ket ipulongda kenkuana no black sand mining ti aramidenda a saan ket a dredging.

“Saan kadi a napinpintas no matiliwtayo ida nga agar-aramid iti dakes?” kinuna ti gobernador idinto nga impatalgedna nga isu a mismo ti mangpatiliw ken mangpapanaw kadakuada no agminasda iti black sand.

Kinuna ti gobernador nga imbilinna payen iti coast guard ken iti DENR iti panangkitada no kumpleto met la dagiti dokumento dagiti operators ken ipulongda kenkuana aniaman nga iregularidad a masukalanda.

Iti maysa nga interbio ken ni Caoayan Mayor Germie Singson-Goulart, kinunana a maysa a proyekto ti lokal a gobierno nga idadauluanna ti pannaka-dredge ti Mestizo River agsipud ta silted daytoyen a pagamkanna a pakalayusan dagiti bumarangay iti asideg ti karayan iti panawen ti matutudo.

Ngem suspetsa iti kampo ni Fr. Rosimo a maaramat dagiti bapor a nagpondo iti kabaybayan iti asideg ti Barangay Poro para iti black sand mining.

Alegasion ti kampo ni Rosimo a ti panagminas iti black sand ti makagapu iti pannakalayus dagiti coastal barangays.#