Awan foul play pannakatay construction worker

CANDON CITY, Ilocos Sur – Awan pagilasinan nga adda foul play iti pannakatay ti maysa a construction worker, daytoy ti inisial a takuat dagiti inbestigador ditoy.

Segun kadagiti inbestigador, awan ti pakailasinan iti foul play iti pannakatay ni Manuel Haban y Yaeng, 40, naasawaan, construction worker a nasarakan a maysan a bangkay sadiay Barangay Patpata 2nd, Candon City idi agsapa ti Enero 16.

Nasarakan ti maysa a John John Haban y Toquero, 39, ti biktima a nakapakleb iti dua metro ti kababana a kataltalonan a napandagan iti bisikletana.

Naideklarar nga awanen ti biag ni Haban idi intarayda iti Candon City Hospital.

Segun iti maysa a Rosendo Toquero y Barroga, 28, residente iti Barangay Patpata 2nd, idi karabian ti Enero 15, kinainomda ni Haban ngem nagpakada daytoy nga aggawid idi agarup 9:00 ti rabii ta nabarteken.

Kabigatanna, nasarakan laengen a bangkay ti biktima iti kataltalonan.#