Footer

Awan kurapsion, anomalia iti city government – Mayor Ferdie

Ik-ikkanda iti malisia dagiti non-issue, kuna ti mayor

VIGAN CITY – Awan ti kurapsion wenno anomalia a maar-aramid iti gobierno ti siudad.

Daytoy ti impetteng ni Mayor Ferdinand C. Medina mainaig iti alegasion dagiti kritikona nga adda naduktalan ti Commission on Audit a panaglabsing iti pannakamanehar iti pundo ti city government ditoy.

Kinuna ni Medina a nakalukat ti libro ti city government, ti opisina ti mayor, tesorero ken uray ti COA ket nawaya a mapan latta agusisa dagiti kritiko agsipud ta “awan ti maar-aramid nga anomalia” iti gobierno ti siudad.

Iti interbio kenkuana ni Jun Ramos, host ti programa a Barangay Brigada Commando, inlawlawag ni Medina nga idi katugtugawna a mayor, iti damo a gundaway, nagbalin ti PBAC a BAC ket saanen a kameng ditoy ti chief executive.

“Pinadasda nga isina (BAC) kadagiti politiko, dagiti opisial ti city government… su a nagbalin a plantilla position dagiti members,” kinuna ti mayor.

Inannugot ni Medina nga iti dati a procedure, maiwayat ti canvass ket no asino ti kababaan (iti presio), isu ti paggatangan ket daytoy ti maysa a finding ti COA a “lapses” ti city government a nangirekomendaanna nga “awanen ti shopping no di bidding ti maiwayat”.

“These are not intended lapses, saan a lapses nga inaramidmi intentionally. Lapses a talaga a naaramid because that was the old system,” kinuna ni Medina.

“Ngem awan ti imbagbaga ti COA nga adda basolmi…, nga adda malversation, (adda) corruption a maar-aramid,” inyunay-unay ti mayor.

Inlawlawag pay ti mayor a sabali pay a naduktalan ti COA ti panagideposito ti kuarta iti bangko manipud iti tiendaan.

“Naaramid daytoy a sistema idi tiempo ni Mayor Eva. Ta ti kayat ni Mayor Eva, bassit a tao ti agiggem iti kuarta… ta no ipanda pay iti treasurer’s office, baka maturog pay (iti treasurer’s office),” kinuna ni Medina sana intuloy a “rekomendasion ti COA, nasaysayaat a lumabas (ti kuarta) iti treasurer tapno maymaysa ti accountable officer.”

“Technical procedural defect ti kunada but there is no malversation, there is no corruption,” kinuna ni Medina.

Kinuna pay ni Medina a “nakaad-adu ti ar-aramidenmi a napintas, ngem ik-ikkanda iti malisia dagiti non-issue idinto nga inyunay-unayna a “no ikumparatayo ti Vigan kadagiti sabali nga LGUs, maysa a kapintasan iti panagmanehar iti pundo ti city government.”

“Agar-aramidtayo iti isyo, ti narigat, amangan no mamati dagiti kalugarantayo iti siudad ti Vigan,” kinuna ni Medina sana innayon nga “awan ti maar-aramid a madi iti city government.”

“We are very open. We are transparent. You are always welcome to see the record of the city government,” inyawis pay ni Medina kadagiti kritikona.