sinursuran-banner-sqSinursuranNi Jobert M. Pacnis

Awan Lat’ Yamanek, Kunam?

Sinursuran: Kolum ni Jobert M. Pacnis
(Maudi a paset)

Rugiantayo iti panagriing iti agsapa. Iti pannakaammotayo a sibibiagtayo pay met laeng, a sabali manen nga aldaw ti sumangbay/naisagut, nagdakkelen a parabur a rumbeng a yamanentayo. Anianto la ketdin no masirayantayo a kasta met dagiti ipatpategtayo iti biag?

No aglutotayo, ay, ket adda pay laeng gayam isaang nupay kasano ti rigat, saan kadi a rumbeng a yamanen? Saan pay a datayo ti nakakaasi la unay. Ad-adu pay.

Rumbeng pay a yamanentayo nga adda panggedantayo kadayta nga aldaw. Nupay kasano ti kinanumona, ken saan a permanente, parabur dayta. No talaga a binaybay-annatayo ti Namarsua, apay ngarud nga adda latta sidadaan a pagtaudan ti ipaunegtayo iti inaldaw? Saan kadi nga Isu met laeng ti agar-aramid iti pamuspusan iti kasta, ditayo agbisin?

Iti ipapantayo iti panggedan a sisasalun-at, kastanto met laengen iti panagsublitayo— nga awan ti nasalaw a disgrasia wenno dakes a napasamak, saan ngata a rumbeng a yamanen dayta? Aglalo pay no sangpetan ti pamilia a siiisem, sisasalun-at ken nakaragragsakda a mangpadpadaan kadatayo?

Ti angin nga ang-angsentayo iti inaldaw, ti danum nga inumentayo, saantay’ nga ikankano ngem nagdakkelanda a sagut a rumbeng pay a yamanentayo iti Dios.

Ket ti kaadda ti pagtaengantayo? Ti kinatalingenngen, kinaulimek ti panagbiagtayo iti inaldaw-aldaw? Ti pannakaammotayo nga awan kabusortayo, saan ngata a rumbeng a pagyamanan?

Wen, pudno la unay nga adu ti rebbengna a pagyamanantayo iti Dios. Saan ngarud a panunoten a binaybay-annatayo. Agnanayon latta ti ayatna kadatayo. Dayta ti kinapudno.
Dagiti masagsagangtayo a rigat iti inaldaw-aldaw, dagitoy ti mangkaykayas iti kinataotayo tapno agbalintayo a nasilap, nalamuyot iti imatang ti Dios iti masanguanan. Ngarud, rumbeng la unay a sanguen dagiti agsasanggala a pannubok. Yamanentayo dagitoy a mangtentenneb iti kinataotayo. Amin a pannakasuot, no malabsan, adda dakkel nga agur-uray a gunggona.

Malagipko la unay ita ti maysa a homilia ni Fr. Glenn Gomez iti maysa a telebision. Inaramatna nga ehemplo ni Mark Zuckerberg ken ni Priscila nga asawana. Kas pagyaman ni Mark iti maaw-awatda a grasia nga agassawa, indonar/inted/intulongda ti 99% a napastrekna iti Facebook. Wen, 99%. Agdagup dayta iti $45B. Kayatna a sawen, maysa porsiento laeng ti para iti pamiliada.

Ni Mark ti nangpartuat iti social media a Facebook.

Datayo, maitedtayo ngata met ti 99 porsiento ti ania man a mapastrektayo? Kalokuan, mabalin a kunaentayo. Ngem addan nakaaramid kadayta. Uray ti pamilia Gates nga am-ammotayo iti lubong ti internet, di met magatadan dagiti ipapaayda a tulong iti sangalubongan.

Ala, saan met a kidkiddawen ti situasion a tuladentayo dagiti nasao a personalidad. Ti napateg, ammotayo ti agyaman. Ammotayo a yukrad dagiti dakulaptayo. Ammotayo nga aklonen ti adda kadatayo.

Ita a Paskua, masapul nga utobentayo ngarud ti kinataotayo. Kalpasanna, siraragsaktayo a mangipeksa ti panagyamantayo kadagiti kakabsat a rumbeng a pagyamanan. Saan nga itantan daytoy a banag. Saan nga agpangadua a mangaramid. Aramiden itan ta agang-angestayo pay. Maysa kano daytoy a mangipallangatok iti espiritutayo; ta iti panagyaman, parparangrangentayo ti biag dagiti kakabsattayo.

Saan met a liplipatan ti agyaman iti Dios la unay. Ti panangisagutna iti bugbugtong la unay nga Anakna—a lagipentayo ita—ti panamagbalinna a tao tapno makapulapoltayo ken agsagaba tapno masubbot dagiti basoltayo, ti masapul a pagyaman la unay. Sangalubongan a panagyaman!

Ala ngarud, ka-Sinursuran, rugiamon ti agyaman iti aglawlawmo.

Siak? Agyamanak, ka-Sinursuran, iti panangtartarabaymo iti kolumtayo. Sika ti paratignay ken makagapu nga agtultuloy daytoy. Sapay la koma ta makaduaka manen iti sumaruno pay a tawen.

Naragsak a Paskuatayo amin!#