sinursuran-banner-sqSinursuranNi Jobert M. Pacnis

Awan Lat’ Yamanek… Kunam?

Sinursuran: Kolum ni Jobert M. Pacnis
(Umuna a paset)

“SULASU ti panagbiag! Isu nga ania koma ti rambakak wenno yamanek itoy a Paskua?”

Mabalin a kunaen dayta ti dadduma. Ta, wen, iti manen makatawen a napalabas, awan man laeng ti immalut-otan ti biagtayo. Sangkasapulan-sangkaapuyan idi. Kasta met laeng ita. Awan nagnaan dagiti sakripisio, bannog ken panagbiag a sililinteg. Nagtalinaed iti ngato dagiti adda iti ngato; dagiti adda iti baba, adda latta iti baba.

Wen, iti biagtayo, dumteng met dayta panagpulkok. Apay nga agpayso a di maitarayan ti rigat? Masaludsod pay ketdin no maminsan no agpayso nga adda Dios. Ta no pudno nga adda, apay nga ipalubosna ti panagrigat idinto nga ar-aramiden met dagiti panglakagan tapno rumang-ay? Uray makaaddang la koma met iti bassit.

Wen pay ngamin. No kitaen ti aglawlaw, adu dagiti kakabsat iti baba a kasta unay ti panangigubetda ti bagida tapno laeng maitarayanda dayta a rigat a mangar-arakup kadakuada. Ngem no apay a kasla tekka a nakakapet kadakuada daytoy. Addada dagiti pa-easy-easy laeng ngem anian ta nagnam-ay ti panagbiagda. Kasla agay-ayus ti sumangbay kadakuada a grasia, kinaimbag wenno gasat.

Isu a no maminsan, adun ti makalipat kadatayo a sumrek iti simbaan. Usarentayo laengen dayta nga aldaw nga agsapul iti panilpo iti anges. Umanayen ta panagtangad sangkabassit iti Ngato sakbay a rummuar iti balay wenno no adda iti panggedan.

Ngem di koma a rumbeng a kastoy ti mapaspasamak. Ania man ti kasasaadtayo itoy a biag, adda makagapu ken kagagapuna. Mayannatup latta nga agyamantayo iti Dios kadagiti mapaspasamak kadatayo. Ti Biblia, isursurona kadatayo ti panangpraktistayo no kasano ti agyaman.

“Kanayon nga agyamankayo iti Dios Ama gapu kadagiti amin a banag, iti nagan ni Apotayo a Jesus.” (Efeso 5:20).

Daytoy a panagyaman, saan laeng a maiturong iti Namarsua no di ket kadagiti kakabsattayo. Kas kuna met laeng ti Dios a no ania man ti aramiden/sawentayo kadagiti kakabsat, isuna met laengen ti nangaramidan/nangisawangantayo.

Kasano ngarud ita ti rumbeng a panagyaman?

Umuna unay, agyaman a sipupuso. Saan a parparapaw. Kasano man kabassit ti kinaimbag a naaramidan ti kabsattayo kadatayo, maitutop laeng nga ipeksatayo ti panagyaman nga awan panaginkukuna—iti natural a wagas, saan a kinaplastik.

Kitaen dagiti kanumuan, dagiti kasla awan aniamanna ti trabahoda a ditayo ikankano. Kas koma dagiti guardia iti pagadalan dagiti annaktayo. Pagyamanantayo met ida; saan lattan a dagiti mannursuro. Isuda dagiti mangkitkita iti inaldaw a kinatalged dagiti annaktayo kabayatan ti kaaddada iti pagadalan.

Awan ti material a pagyamantayo? Umanayen ti personal a panagyamantayo, pannakipatpatang a mangiparikna a napategda kadatayo. No adda sangkabassit a mula iti aglawlaw, mabalin a padawatantayo iti pangramananna; wenno no makagiddan iti lugan, saan met siguro a narigat nga ilibre iti pamasahe. Babassit dagitoy a banag ngem dakkel ti epektona iti maseknan.

Lagipen met a pagyamanan dagiti agtrabtrabaho a siuulimek nupay no arigen, awan ti pannakaikabitda iti biagtayo. Kas koma dagiti dianitor ti ili. Mabalin a patulodan ida iti surat ti pagyaman (uray di ilanad ti nagan). Ipeksa ti kinapategda iti pannakapagtalinaed ti kinadalus ti aglawlaw; nga isuda ket makitkitayo, malaglagiptayo dagiti rigatda. A saan a pudno nga awan ti mangikankano kadakuada.

No agyamantayo, masapul nga ispesipiko. Kas koma iti panggedan, imbes a sawen iti katrabahuan ti “Nice job,” napimpintas nga amang no “Saludoak iti inaramidmo iti nariribuk a klientetayo.”

Ita, iti bukodtayo a bagi, adda kadi met rumbeng a pagyamanantayo?

No ammotayo nga ipateg, uray dagiti babassit a banag, saan la ketdi a mabubo ti yamanentayo iti inaldaw. Ket matdatayo a mangtagibassit iti bagitayo no mautobtayo amin dagitoy.

Anian a nagdakkelan a basol daytoy, mabalin pay a kunaentayo.
(Adda tuloyna)