Awan maikkat iti reorganisasion ti city government

VIGAN CITY –  Impatalged ni Mayor Eva Marie S. Medina nga awan ti maikkat nga empleado iti  gobierno ti siudad ditoy, kas pangalay-ayna iti amak dagiti empleado, nangruna dagiti casual ken awan ti civil service eligibilityda.

Inlawlawag ni Medina nga adda dagiti agsusueldo iti siudad a nabayagdan iti puestoda ngem dida pay nakaala iti eligibilityda ket adda met dagiti empleado nga addaan eligility nga agur-uray a maipan iti puestoda.

Itay nabiit, napagpermanente dagiti sumagmamano nga empleado nga adda civil service eligibility.

Naammuan iti mayor nga iti kadagupan a 114 a posision, napagpermanenten ti kaadduan ket sumagmamano laengen ti nabati a pakaibilangan dagiti empleado nga awan ti makita a kaibatogan a puesto iti kabaelanda.

Kinuna ni Medina a kalpasan ti pannakaited dagiti permanent positions, isingasingnanto iti sangguniang panlungsod ti panangipasada iti legislation para iti pannaka-reorganisa dagiti nadumaduma nga opisina iti siudad.

Kinuna ti mayora a kas naadalna iti strategic planning workshop, mabalin met a “damadamaen” dagiti hepe dagiti nadumaduma a departamento no makita a saanda nga epektibo iti posisionda ket maipuestoda iti opisina a  pagpigsaanda a pagserbian.

“…No agalaka kadagiti empleado, saanmo nga insigida nga ammo ti kabaelanda, ngem no nabayagmon a nakatrabaho ken nakapulapol, isunto la ti pannakakitam a saan a ditoy ti yan ti pagpigsaanna no di iti bangir nga opisina,” kinuna ti mayora.

Nupay kasta, kinuna ti mayora a sakbay ti reorganisasion, iwayatda nga umuna ti komprehensibo a panangsukimat iti pakasaritaan dagiti empleado.

“Kitaenmi ti backgroundna, no ania ti inadalna, ken no ania ti skillsna…, nakuna ni Medina.

Impatalged ni Medina nga iti maaramid a reorganisasion, awan ti awan ti bumaba ti sueldona wenno salary gradena, kasta met nga awan ti maikkat iti puestoda.

Kinunana a no pagbatayan ti tugtugawanda a permanente a posision, saan a mabalin a maikkatda iti puestoda.#