Footer

Awan masingir agpasiar iti Baluarte: Chavit

VIGAN CITY – Kinuna ni Governor Luis “Chavit” Singson nga awan ti masingsingir kadagiti sangsangaili ken turista a mapan agpasiar iti Baluarte a pagtaenganna.

Kinuna ni Singson a nawaya amin dagiti turista nga agpasiar iti Baluarte nga awan ti bayadanda ta mabain nga agsingir kadakuada ket inrakurakna daytoy tapno “malawlawagan ti panunot dagiti tattao.”

Imbatad daytoy ti gobernador tapno pukawenna ti damag nga adda masingsingir kadagiti sangsangaili ken turista nga agpasiar iti Baluarte para iti pagpakan kadagiti tarakenna nga ayup.

Maysan a tourist attraction ditoy Vigan City ti Baluarte a saan a malibtawan a pasiaren dagiti turista ken dagiti nadumaduma a grupo wenno gunglo nangruna dagiti estudiante ken dagiti pagadalan agsipud ta malaksid a maadakanda ti pagtaengan ti nalatak a gobernador a nakaigapuan ti pannakapatalsik ti maysa a Presidente, masarakan ditoy dagiti ayup a taraken ni Singson a pakairamanan ti Bengali tiger, pandek a kabalio (asno), ostrich, beklat, farm a pakatartaraknan dagiti nadumaduma a klase ti kulibangbang ken dadduma pay.

Ngem inlawlawag ni Singson ni Singson nga awan ti magasgastona iti taraon dagiti tarakenna nga ayup nangruna ti tigre ken beklat ta dawdawatenna dagiti ulo ti manok iti San Miguel Corporation iti San Fernando City.

“Libre dagitoy nga it-ited ti SMC,” kinuna ni Singson sana innayon a “dagiti umapal” mabalinda ti mapan dumawat iti Baluarte ta agsobsobra  ti maalada nga ulo ti manok iti nasao a kompania.

Kinuna ti gobernador a nupay adda dagiti empleado ti gobierno ken estudiante iti Ilocos Sur Community College, libre amin ket no adda man dagiti paggastuan iti Baluarte, “kabaelanna ta milion ti mapaspastrekna kadagiti negosiona.”

“Apay ketdin a singirek ida (turista ken sangsangili) ket pagragsakak,”  kinuna ni Singson sana inyunay-unay a no masingir dagitoy,  “saanen a makapasiar iti Baluarte dagiti awan pagbayadda.”#