Footer

Awan napalubosan nga agminas iti kabaybayan ti Santa Catalina: mayor

STA. CATALINA, Ilocos Sur – Awan ti pinalubosan ti munisipio kadagiti kompania ti minas a nagaplikar iti pannakabukibok ken panagala iti iron magnetite iti aplaya dagiti coastal barangays ditoy.

Daytoy ti reaksion ni Mayor Carlos Asuncion iti alegasion nga adda kompania nga agminminas iti kabaybayan a sakup daytoy nga ili babaen ti pammalubos ti gobierno munisipal nga idauluanna.

Impakaammo ni Asuncion a sipud idi Oktubre itay napan a tawen, addan walo a kompania ti minas a nagaplikar tapno kitaenda ti kadaratan para iti posible a panagalada iti iron magnetite a maaramid a landok ken pagtaudan iti kanayonan nga income daytoy nga ili ngem inyunay-unayna nga ad-adda a ti boses dagiti umili ti nagpannuray.

“Ti kayat dagiti umili ti rumbeng a denggek ket ditoy ilimi, saanmi a kayat ti quarry ta mangitunda daytoy iti pannakadadael ti igid ti baybay nga itantandudomi kas tourist spot,” kinuna ti mayor.

Kabayatanna, imbatad ni Asuncion a kasapulan unay ti media iti pannakaidanon ti impormasion mainaig iti agduduma a proyekto ken aktibidad dagiti local government units kadagiti umili.

“Diak biangan ti aniaman a kapanunotan dagiti kameng ti konseho iti aniaman a gakat a kayatda nga idatag iti session hall ngem ketdi daytoy nga ibagak ket bukodko laeng a kapanunotan,” kinuna ni Asuncion iti eksklusibo nga interbio kenkuana ti Around Ilocandia Channel idi Hulio 29.

“Nadardarasko a maipakaammo dagiti impormasion ken maipakaawat ti pagsayaatan dagiti irugik a proyekto no adda ti media a mangipatangatang kadagitoy, isu nga asinoman a kameng ti media nga umasideg kaniak manipud iti print, radio wenno telebision, sisasaganaak a makiuman kadakuada,” inlawlawag ti mayor idi masaludsod kenkuana ti reaksionna iti singasing ni Konsehal Violeta Reotutar a pannakaiparit ti media a mangkober iti session ti sangguniang bayan ditoy.

Inamin pay ni Asuncion a maysa ti ilina kadagiti agdepdepende iti internal revenue allotment (IRA) gapu ta malaksid iti nadakamat  a paggapuan ti pondo, awanen ti sabali pay a dakkel a pamataudan ti ili.

Kinuna ti mayor a nagkiddawda iti tulong iti gobierno probinsial ken iti opisina ti diputado iti umuna a distrito tapno mabangon ti maysa a public market iti sentro ti ili.

“Nupay asidegkami iti siudad ti Vigan, kasapulan met nga adda bukodmi a tiendaan tapno ditoy a mailako dagiti produktomi iti talon kangrunaanna kadagiti ipampannakkel ti ili nga organically produced a natnateng,” kinuna pay ti mayor.#