Footer

Awan ti agbiag a para iti bagina laeng

No intay taldiapan dagidi nga aldaw a kairut la unay ti barikes ti pagilian gapu iti naitikleb nga ekonomiana, saan a nagpangadua ti adu a nasion a timmulong tapno makaallangon iti nakaitublakanna a kinarigat. Nakabangon ti pagiliantayo babaen dagiti naruay a tulong pinansial ken moral a suporta.

Idi naitikleb ti ekonomia ti pagilian, saan a nagpangadua ti International Monetory Fund (IMF) a simmaranay. Nagpautang tapno masilpuan ti angestayo – utang a binayadan ti pagilian iti atiddog a panawen agingga idi 2006.

Ita, maiparbeng laeng nga idiaya met ti gobierno ti ukrad a dakulapna kadagiti naitikleb. Maitutop ngarud ti panangipautang ti pagilian iti $1 billion iti IMF.

Agtaud ti ipautang iti international reserves wenno  foreign exchange reserves – ti reserba nga aywan ti Bangko Sentral. Addaan ti pagilian iti $70 billion a foreign exchange reserves. Saan nga ipadawat ti pagilian dayta a gatad no di ket ipautangna. Kumita ti pagilian babaen ti interes dayta nga ipautangna malaksid a makatulong pay.

Trading partners ti pagilian dagiti nasion iti Europa. Dakkel ti eksportasion ti pagilian sadiay lalo iti manufacturing ken agriculture. Adu dagiti OFW nga agtrabtrabaho sadiay ket agipatpatulodda iti dollar remittances a pagbasisawan ti ekonomiatayo.  No buyaentayo lattan ti pannakadaleb ti ekonomia iti Europa, adu a kailiantayo sadiay ti maawanan panggedan, kasta met a maputed ti nasalun-at a taray ti eksportasiontayo.

Kas kameng dagiti nagkaykaysa a pagilian para iti panagsisinnaranay, rumbeng laeng a tumulong ti pagilian kadagiti nasion iti Europa, partikular dagiti nasion ti Greece, Spain, Portugal, Ireland ken Cyprus nga agsagsagaba iti Euro Zone debt crisis ken ti Italy a posible a makapasar met iti daytoy a krisis.  Adda 17 a nasion a mangbukel iti Euro Zone, ket no agkrisis ti apagkatlo a bilang daytoy, dakkel ti epektona iti nasalun-at a panagtaray ti negosio ken panaggiginnatang iti sibubukel a rehion.

Mangipabulod dagiti nagkaykaysa a nasion iti minimum a $1 billion no la ket kabaelanna. Kabaelan ti pagiliantayo dayta ta addaan iti umdas a foreign exchange reserves; ngarud, saan nga agtaud iti domestic currency wenno peso wenno iti badiet ti pagilian ti ipabulodna.

Saan koma a nabara nga isyo a mayabyaban wenno pagdidinniskutiran ti panangipabulod iti sangkatipping a linaon ti bulsa agsipud ta maitutop ken makatao ti sumaranay. Laglagipen nga aramid a maiparbeng la unay ti sumaranay iti makasapul ti tulong ta awan ti agbiag para iti bagina laeng.#