Awan ti di kas iti agannad, mare!

Salaysay ni Judith M. Simon

( Tuloyna)

Daytoy a pagdalus iti silver, ‘Mare, ket awan dumana iti danum. Colorless, awan angotna. Uray nainummon, awan pay laeng pangipagarupmo a kemikal gayamen ti simrek iti bagim. Nga ipataymo insegida kalpasan laeng ti sumagmamano a minuto.

Nakakaskas-ang daytoy a pasamak, ‘Mare. Dakkel ketdi a leksion kadatayo nga inna. Umaw-aweng latta met ti kinapateg ti naadaltayo iti uneg ti klase. Dagiti kemikal ket rumbeng unay a maipuestoda iti saan a magaw-at dagiti ubbing. Ta saan la mammamin-ano ti disgrasia.

Isu a sika, ‘Mare, rugiamon a kitaen dita kosinam. Ania dagiti rumbeng nga ipaknim? Ania dagiti masapul a di aggian iti maymaysa a disso? Nayon man a trabaho daytoy, akmenta koma a sipupudno. Ta awan ti sabali nga agbalin a biktima no di dagiti ipatpateg iti biag.

Itoy a napasamak kadagiti entertainer, sabali manen ti sumsumrek iti panunotko, ‘Mare. No ngata dagiti lidertayo no kasta nga adda session-da ket pagdalus iti silver met ti mai-supply nga inumenda? Dayta nga inumenda ket adda pay koma nakemna. Saan nga agapekto kadagiti nadalus ti konsensiana. Sabidonganna laeng dagiti rinukeren dagiti nagunegda.

Mano ngata kadakuada ti agbatinto a sikakaradkad kalpasan ti session? Awan ngata, ‘Mare? Wenno sikakaradkadda amin ta absent met dagiti rinuker? Addada nga agpapaimas kadagiti sabsabali a pagilian! Ken kadagiti sidong dagiti ‘bullilisingda?’

Sublianta man ketdi dagiti entertainer, ‘Mare. Narigaten no umasuk dagiti agung ken lapayag dagitay dakdakamatenta. Iti panangaklon ti manager-da iti nagkamtudanna, saan koma a rason daytoy tapno mapalag-an ti dusana. Maipaay koma ti maitutop a pannusa.

Agserbi koma pay ti damag a ballaag ti tumunggal maysa kadatayo. Kitaentayo a naimbag dagiti ipapaunegtayo. Agbalintayo, ‘Mare, nga alisto. Ta ti disgrasia, saantay’ nga ammo no kaano ti pannakapasamakna. Kas met laeng iti mannanakaw. dumteng a di mapakpakadaan!

Kadagiti damdamag, kanayon nga adda iparuar a ballaag ti Ecowaste. Maipanggep daytoy kadagiti ramit, pagpapintas nga addaan iti nangato a lead content-na. Dadaelen ti exposure-tayo iti lead ti salun-at. Saan a madmadlaw ngem in-inut gayamen ti panangrippuogna iti templo a sagut ti Dios kadatayo.

Ditay koma ngarud yaleng-aleng dagitoy a ballaag. Saantayo nga ibaga a makatitileng iti lapayag. Ak-akmenda laeng ti obligasionda kadatayo. Agbalintayo koma a law-abiding citizen. No ania ti linteg, ket ibagbaga dagiti pannakabagi ti linteg, isu ti surotentayo.

Ngem agurayka man, ‘Mare. Pannakabagi ti linteg, nakunak, ania? Ayna, malagipko man daytay maysa a polis iti ili ti Ballesteros iti Cagayan. Simmarungkar kadayta nga ili ti Black Nazarene ti Quiapo itay Mayo 15-19.

Gapu itoy, nagbalin a nainget ti pannakatagiben ti linak ken kappia ta nagadu dagiti tao a simmuknal ken ni Apo Nazareno. Addada nga agkaraiwara dagiti pannakabagi ti linteg. Ngem ammom ti naimatangak? Daytay man maysa kadakuada, idi agmotor a pimmanaw iti nagpuestoanda a kanto, Nagmayat man a pa-text-na while driving in his full uniform. Nagtengnga pay iti kalsada ti panagmanehona, giem!

Di kad’ ipawil ti linteg dayta, ‘Mare?

Ania metten! Isuda pay a mangipakpakat iti linteg ti umuna nga aglabsing!

Indawatko laengen a sakbay a madisgrasia gapu kadayta nga aramidna, mautobna koma a maysa a pannakabagi ti linteg. Mayat laeng no agsolsolo a madisgrasia gapu kadayta nga aramidna. Ngem kasanon ngay no adda/addada mairaman nga inosente?

Ti pungtotko idi, ‘Mare. Bansagek la koma iti bato! Ngem naimuttal met iti imatangko ti tarpaulin ni Apo Nazareno a naisab-it iti igid ti kalsada.

Ney, adun sa la unayen ti nasaok, ‘Mare. Ngem ania ngarud, aya, ket adu met latta dagti rumbeng a pagsaritaanta.

Agingga laengen iti sumaruno. Innak pay akasen dagiti linabaak. Aluadam gayam ta kinamanagpupudot itoy a nagpudot ti panawen, ‘Mare. Adu ti aggud-goodbye, world iti kastoy a panawen.#