Salaysay: Awan ti di kas iti agannad, Mare! | Tawid News Magazine - Weekly Ilocos News 📰

Awan ti di kas iti agannad, Mare!

KOMUSTAKAN, ‘Mare? Medio nabayag sa ketdi a diak immay nakisarsarita kenka. Ita a maisapar, kalpasan dagiti di latta maungpot nga obligasion iti pagtaengan, di kad’ addaak manen. Narigat no malipatannak. Awanton ti kumarekon.

Nagrigat a talaga ti biag ti maysa nga ina, ‘nia, ‘Mare? Ngem at least, enjoy! Umanayen ti isem dagiti ipatpateg nga annak ken asawa a mangpugas kadagiti bambannog iti agmalem.

Napadasamon ti imminum iti makasamal, ‘Mare? Ne, nalabit masdaawka kadaytoy a saludsodko. Ngem adda man pakainaiganna daytoy iti topikota ita.

Idi naduktalam nga adda ‘kakinkinnudalsing’ a sabali ni ‘Pare, saanmo a napanunot ti agsabidong? Ayna, lugayanka man ngarud kadayta, ‘Mare.

Nabuyam ti damag itay nabiit? Saan a dayta Luystahan kada Napolist ti ibagbagak. Masuronak man kadagita. Nagbayagen ti isyo, agsasangan, nakaad-adun ti naturongna. Dika kad’ la maulaw kadagiti rumrummuar maipanggep iti PDAF scam? Kaslatayon naulaw a birabid nga umili iti pampamay-anda.

Ammom, ‘Mare, mapampanunotko nga iti koma panagkimatna (no kaano, a, a dumteng dayta ta, ne, El Nin’o pay laeng met), dagita koma salawasaw, garamugam ti matiruan. No ngata agbanag a kasta, maksetda ngata met? Di kad’ siguden a naksetda… kayatko a sawen, nga immugingen ti kararuada?

Ti la amkek no mapatgan daytoy nga idawdawatko. Baka duata laeng a mabati ‘toy lubong, ‘Mare.

Hmm, napaisemkan sa ketdi? Wenno duata la a mapukaw no kua? Kaano, aya, a mapungtil dagiti sara dagita a kunkunak?

Ngem diak met ketdi patien a dayta naudi ti mapasamak. Adu pay met dagiti garamugam nga agtugtugaw kadagiti saadda. Permi ti panagibolsada kadagiti pondo a para kadatayo nga umili. Dida ipirpirit ti sinapataanda nga akem.

Daytoy damag a dakdakamatek, ‘Mare, ket daytay man maipanggep iti dua nga entertainer a nasabidongan. Napasamak a mismo daytoy iti pagiliantayo, iti mismo a pagnaedanda a kaduada ti manager-da.

Kabalbalasanganna dagiti biktima. Nagpipintasda pay (entertainer ngarud) ken naguubbingda.

Sayang dagiti arapaapda, ‘Mare. Nagpakadadan ditoy lubong. Saandan nga immabot iti ospital.

Gapu iti sobra a pudot iti Kamaynilaan, ken amin sa pay ket a paset ti pagilian, nakarikna iti pannakawaw ni Jane (siempre, saan a ti pudno a naganda ti dakamatek ditoy, ‘Mare). Bimmangon iti iddana (ta rabii idi mapasamak ti insidente). Nagturong iti kosina ti kaserada. Nakakita iti danum iti botelia ti mineral water. Nangibaso ket ininumna daytoy.

Nabang-aran. Inyalisonna ti nabati a danum iti pitsel nga awan ti linaonna sa nagturong iti banio gapu iti awag ti nakaparsuaan.

Simmaruno a bimmangon ni “Steph” a kadua ni Jane, ‘Mare. Mawaw met daytoy. Nangituyag iti danum nga adda iti pitsel. Nagturong met laeng iti banio kalpasanna. Ngem anian a pannakakellaatna ta nakitana ni Jane a nakaidda dita— aglablabutab ti ngiwat daytoy nga awanen ti puotna. Lumitlitem payen ti bagina.

Nagpatulong ni Steph kadagiti kaduada. Kimmaribusoda iti kasera. Intarayda a dagus ni Jane iti ospital. Kimmuyog ni Steph. Ngem addada pay laeng iti lugan, simmaruno met a naawanan iti puot daytoy. Ngem naibagana a napan laeng imminum ket nakitana pay ti naginuman met ti gayyemna a baso.

Ket ditan, ‘Mare, a natuldokan ti naraniag koma a masakbayan dagiti dua nga agtutubo!

Dagus a nagatap ti manager-da a nainum dagiti aggayyem ti impanna iti botelia ti mineral water a pagdalusda kadagiti silver a ramramitda. Idi kitaenda, kaduada dagiti dadduma pay nga entertainer, awanen ti linaon ti nasao a botelia ti mineral water.

Inaklon ti manager ti biddutna, ‘Mare. Imbagana kano met kadagiti kaduada a pagdalus ti linaon ti botelia ngem saannan a nabagaan dagiti dua ta awanda kadagidi a panawen ta addada pay laeng iti trabahoda.

(Adda tuloyna)