Awan ti failure of election iti Baguio City, Compostela Valley

BAGUIO CITY- Impakaammo ti Commission on Elections a saanda a mangiwayat iti special elections maigapu iti panagsinnukat dagiti balota nga agpaay koma iti Compostela Valley ken sumagmamano a presinto ditoy siudad.

Inlawlawag pay ti poll body nga  awan ti indeklarada a failure of elections iti Compostela Valley ken daytoy a siudad iti baet nga awan ti pangnamnamaan a maisubli dagiti balota kadagiti nakairantaanna a lugar.

Iti pannakiuman ti media ken ni Comelec Chairman Sixto Brillantes, kinunana nga ideklarada laeng ti special elections kadagiti nadakamat a lugar no makaapekto ti resultada iti eleksion.

Kinuna ni Brillantes a saanen a maisayangkat pay ti special elections no bassit laeng dagiti botante kadagiti nadakamat a lugar.

Sakbay ti panaglukat ti panagbubutos, naduktalan dagiti poll officials a napagsinnukat dagiti balota nga agpaay koma iti uppat a presinto iti Barangay Lualhati iti Baguio City ken iti Gabi, Compostella Valley.

Ngem kinuna ni Brillantes nga iti dayta a kaadayo ti Compostela Valley iti Baguio City, saanda la ketdi a maideliber dagiti balota iti las-ud ti daytoy nga aldaw.

Apay nga aggasto ti Comelec iti P5 milion para iti special elections kadagiti nadakamat a lugar no bassit met laeng ti bilang dagiti botante ken saanda a maapektaran ti resulta ti eleksion? nakuna pay ti chairman ti Comelec.

Imbes nga iti Gabi, Compostela Valley ti nakaipatulodan dagiti balota, naideliber ketdi dagitoy para iti 379-A, 379-B, 380-A at 381-A iti Barangay Lualhati, Baguio City.

Addaan dagiti apektado nga uppat a presinto iti 638 a botante.

Nupay imballakad ni Brillantes ti panaguray dagiti botente agingga iti panagserra ti panagbubutos, saanna nga inrekomendar ti pannakaiyalud-od ti panagbubutos kadagiti nadakamat a lugar.#