Awan ti imposible ditoy lubong – Jessica Cox (Maudi a paset)

Ni Salvador A. Espejo

 

Kualipikado ni Jessica nga agpatayab iti light-sports aircraft agingga iti kangato a 10,000 kadapan.

“My right foot is on the yoke, and my left foot is on the throttle. I use both feet, and I don’t have special equipment. I just fly the plane,” kinuna ni Jessica idi madamag no kasano a makapatayab iti eroplano.

Iti panagadalna nga agbalin a piloto, immabut iti tallo a tawen a nag-training imbes iti kadawyan nga innem a bulan a mangkumpleto iti lisensiana nga agpatayab iti lightweight aircraft. Tallo dagiti flying instructorsna ken nagsanay nga agpatayab iti eroplano iti aganay 90 nga oras.

Kinuna pay ni Jessica a dakkel a karit kenkuana ti panagbalinna a piloto iti baet nga adu dagiti nangublag ken nangtagibassit iti kabaelanna agsipud iti kinaawan ti imana.

Nagadal iti kinapiloto tapno maipakitana a no adda “tarigagay, kinapinget ken kaawan iti amak, maaramidtayo amin”.

“Nalaing a piloto ni Jessica,” kinuna ni Parrish Traweek, 42, flying instructor ti San Manuel’s Ray Blair Airport, ken mangpatpataray iti PC Aircraft Maintenance and Flight Services ken nang-training kadagiti adun a piloto.

Kinuna ni Traweek nga ammonan nga awan ti problema ni Jessica nga agpatayab iti eroplano idi makitana daytoy a nangmaneho iti kotsena idi mapan iti pagadalanna.

“Impamatmat ni Jessica nga awan ti limitasion,” innayon ni Traweek. “Naisangsangayan a babai.”

Kinuna ni Jessica a pinadakkel dagiti nagannak kenkuana a mamati nga awan ti saanna a maaramid uray awan ti imana.

Kinapudnona, idi agtawen iti 14, saannan a  kinayat ti agaramat iti prosthetic devices.

Kinuna ni Jessica a makasali laeng daytoy iti panagtignayna isu nga indulinnan iti closet.

Ket impakitana a kabaelanna, babaen ti panangaramatna kadagiti sakana, nga annongen dagiti banag nga aramiden ti tao nga awanan iti pisikal a depekto.

Kabaelan ni Jessica ti agmaneho iti kotse nga awan ti modipikasionna ken awan ti restriksion ti lisensiana, kasta met ti manggasolina iti luganna.

Saanna a kasapulan ti mangasistir kenkuana no ikkaten ken ikabilna ti contact lens ti matana.

Kabaelanna pay ti agmakinilia iti keyboard babaen ti pardas a 25 a balikas tunggal minuto.

Nadumaduma dagiti sports a sinerrek ni Jessica kas iti gymnastics, taekwondo ken panaglangoy. Nalaing nga scuba driver ni Jessica.

Isu pay ti umuna nga awanan ima a nagbalin a black belter iti American Taekwondo Association. Kinapudnona, dua payen ti black beltna iti taekwondo.

Malaksid iti dayta, nagturpos ni Jessica iti Bachelor’s Degree iti Psychology iti University of Arizona ket agtrabaho a kas motivational speaker.

Naglatak ni Jessica Cox idi naiparang iti You Tube dagiti videona ken dagiti nagapuananna iti baet nga addaan iti rangkap.

Pinadayawan ngarud ti Guinness World Record a kas kaunaan a babai a makapatayab iti eroplano a dagiti laeng sakana ti aramatenna.

Intudo ni Jessica nga utangna dagiti gapuananna iti panangsuporta kenkuana ni Inez nga inana, ni William nga amana, ken dagiti kakabsatna a da Jason ken Jackie.

Impalgak ni Jessica nga idi napan iti Roma, naaddaan iti gundaway a nakapatangna ni Pope Benedict XVI ket imbagana iti nasantuan a papa nga isagutna ti medaliana manipud iti Guinness World Record  agsipud ta mamati a saanna a nagun-od ti pammadayaw babaen laeng ti bukodna a kabaelan, no di “naggapu iti ngato”.

Kinuna ni Jessica a saan koma a mapukawan iti namnama dagiti padana nga addaan iti rangkap a mangsurot iti tagainepda iti baet dagiti karit.

“Awan ti imposible ditoy lubong,” nakuna ni Jessica.

Adtoy ti mensahe ni Jessica kadagiti Filipino.

“Tunggal maysa kadatayo, addaan iti karit, pisikal man, sikolohikal wenno emosional.  …Ngem addaantayo met iti pagpilian no ituloktayo nga agbalin a bangen iti dalan, wenno ituloktayo a daytoy ti maited a gundawaytayo nga agballigi. Amintayo ket addaan iti dayta nga opsion. Adda kenka ti panagpili.”#