Awan ti imposible ditoy lubong – Jessica Cox

Ni Salvador A. Espejo

Umuna a paset)

 

Kadatayo a naparaburan iti nalabon a biag, dakkel ti pagyamanantayo iti Namarsua, ken iti Anakna a naitao iti Paskua. Agyamantayo gapu ta naparaburantayo iti  natalged a panggedan, saantayo a makurkurangan kadagiti aginaldaw a kasapulantayo iti biag, natalna ken naragsaktayo iti denna dagiti ipatpategtayo iti biag, ken naikkantayo iti naan-anay a salun-at ken tibker ti bagi a mangannong kadagiti pagrebbengantayo, kas umili ken nasayaat a kristiano.

Sabali ti posible a marikna dagiti makurkurangan unay iti biag wenno dagiti daksanggasat. Mabalin nga ibilangda a napait nga apro daytoy a kasasaadda iti biag, ti biag a dida ammo ti pangalaanda iti pagbiagda iti inaldaw-aldaw.

Kastoy met laeng siguro ti marikna dagiti naiyanak nga addaan rangkap wenno addaan iti pisikal a depekto. Mabalin a sidirenda ti lubong, uray pay ti Namarsua no apay a naiyanakda a kasta ti kasasaadda, a kasla ketdin nailunodda a parsua. Saanda a maako wenno maawat daytoy a kinapudno, ket ibilangdan ti bagbagida nga awan serserbida, a kayariganda ti ruting wenno gabat a makugkugtaran iti kagimongan.

Ngem itay nabiit, naawis ti imatangtayo iti maysa a damag mainaig iti  maysa a kadaraantayo a simmarungkar ditoy pagiliantayo a nangidateng iti bang-ar iti nabantot a barukong, a lalo pay a pinadagsen ti iduduprak manen ti sabali pay a kalamidad iti pagiliantayo a nakatayanen ti agsangaribun a tattao ken panagpukaw dagiti nasurok a 600 a residente iti Cagayan de Oro gapu iti flash flood, dagiti pammapatay, panaghold-ap, panagsaneb a nakaaramatan kadagiti makapatay nga igam, dagiti pinnadakes ken di panagkikinnaawatan dagiti agtuturaytayo, imbes koma nga isuda ti mangidaulo kadatayo nga umili nga agbalin a nasayaat ken pagwadan a makipagili.

Kayarigan ti damag maipapan iti kadaraantayo iti umuna nga arbis a nangalep-ep iti natikagan a kataltalonan iti panawen ti kalgaw.

Idi Oktubre 10 daytoy a tawen, simmarungkar iti Pilipinas ni  Jessica Cox,  maysa a Fil-American, kaduana ti inana ken ti nobiona. Iti isasarungkarna ditoy pagilian, kangrunaan a nagbakasionanna ti Samar, ket makabulan a nakipagindeg kadagiti kakabagianna.

Makaawat bassit ni Jessica iti Cebuano ngem saan a makasao iti daytoy.

Ngem ania ti pakaidumaan ni Jessica kadagiti naruay a kapadana a Fil-American a simmarungkar iti ramutna a pagilian? Ngamin, saan a kadawyan a babai ni Jessica,  ibagianna dagiti mabilbilang a babbai a nangipaneknek a no napinget ti tarigagaymo, uray no adda pagkurangan ti pisikal a bagim, saan a bangen daytoy iti dalanmo a manggun-od iti arapaapmo.

Ti pakaidumaan ni Jessica, naitao nga awanan iti ima. Iti dayta a kasasaadna, ken no iti sabali laeng koma a parsua, saanen a makaalut-ot iti dayta a kinadaksanggasatna a naiyanak, agbalin laengen a paduduolan, agpampannuray iti kaasi ti lubong.

Ngem sabali ni Jessica, saanna nga intulok a parukmaen ti kasasaadna, saan a narpuog ti  nabileg ti determinasionna a mangipakita nga adda serbina ditoy lubong ken makaipaay iti pagwadan kadagiti kapadana nga addaan rangkap.

Kinuna ni Ines Cox, ti inana,  nga adda idi amakna iti pagbanagan ti anakna iti masakbayan agsipud ta naitao nga awanan iti ima. Saan met a maipalawag dagiti doktor no apay a naiyanak ni Jessica nga awanan iti ima. Ngem timmalged ti rikna ni Ines agsipud ta makapangan ni Jessica ken makaay-ayam nga aramatna dagiti sakana.

Idi 2008, kalpasan ti tallo a tawen a panag-trainingna, nagun-od ni Jessica ti Sports Pilot certificate ket nagbalin nga umuna a babai a lisensiado a piloto a mangpatayab iti eroplano babaen ti sakana.

(Adda tuloyna)