Awan ti koriente iti umuna a distrito ti I. Sur, inton Abril 29

VIGAN CITY – Awan manen ti koriente iti 12 nga oras inton Abril 29 iti umuna a distrito ti Ilocos Sur.

Agawan ti koriente iti umuna a distrito ti probinsia manipud iti alas sais ti bigat agingga iti alas sais iti malem.

Segun iti Ilocos Sur Electric Cooperative, mangisayangkat dagiti teknisian ti National Grid Corporation of the Philippines iti internal inspection iti divider switch ti transformer.

Daytoy ti maikatlo a gundaway nga awan ti koriente iti umuna a distrito ti probinsia iti nasurok a sangapulo nga oras tapno agisayangkatda iti panagtarimaan iti substation ti NGCP.

Nagawan ti koriente idi Pebrero 7 iti 17 nga oras ken idi Marso 14 iti 15 nga oras tapno agtarimaan dagiti teknisian iti substation a masarakan iti Bantay, Ilocos Sur.#