Footer

Awan ti narco politics iti Cordillera – regional director

LA TRINIDAD, Benguet — Awan ti narco politics iti Cordillera Region, daytoy ti imbatad ti police regional director ditoy bayat ti ceremonial burning dagiti pinuon ti marihuana sadiay Camp Bado Dangwa, La Trinidad, ditoy idi Oktubre 5.

Kinuna ni Police Chief Supt. Benjamin B. Magalong nga awan pay ti dimmanon kenkuana a damag nga adda politiko a direkta a nainbolbar kadagiti sindikato ti droga iti Cordillera Region.

“Awan ti narco politics iti Cordillera Region,” kinuna ni Magalong.

Mismo a ni Governor Nestor Fongwan ti nangsilmut kadagiti pinuon ti marihuana a naparut kadagiti sumagmamano a plantasion iti insayangkat dagiti nagtitipon a puersa dagiti polis iti dandani makabulan manipud Septiembre agingga iti Oktubre daytoy a tawen.

Segun ken ni Magalong, agdagup iti P30,464,000.00 ti pateg dagiti pinuon ti marihuana ken seedlings ti pinarut ken pinuoran dagiti rimmaut iti babaen ti COPLAN Five Fingers nga inyussuat dagiti nagtitipon a puersa ti PAIDSOTG ti Benguet, Ifugao ken Kalinga babaen ti koordinasion ti AIDSOTF, RAIDSOTG, Benguet, Kalinga ken Mt. Provincial Police Offices ken ti PDEA-CAR manipud idi Septiembre 7 agingga iti Oktubre 3, 2012.

Ngem kinuna ni Magalong nga adda inisial a report a naawatda a mapapati nga agaw-awat dagiti communist terrorists (CTs) iti kuarta nga agtaud manipud iti illegal a panaglako iti droga iti rehion.

Innayon ti regional director a mapapati nga agaw-awat dagiti CTs iti aganay 23% manipud iti paglakuan iti illegal a droga iti rehion kas revolutionary taxes.#