Awan uray sangkapirgis nga ebidensia (Part 1)

DINISMIS ti Court of Appeals ti petision ti asawa ni Leonardo Ancheta a bilinen ti korte dagiti nangangato nga opisial ti militar ken armado a puersa ti pagilian ken mamagbaga iti nasional a seguridad a mangiparuar iti nagpukaw nga asawana.

Tapno nalawlawag kadagiti agbasa, taldiapantayo ti napalabas.

Nasuroken a makatawen ti napalabas, idi Hunio 26, imbaga ni Leonardo Ancheta ken ni Carmen, ti asawana, a mapanna bisitaen dagiti kakabagianna iti Pampanga. Daytan ti maudi a pannakakita ni Carmen iti asawana.

Dua nga aldaw kalpasanna, nakaawat ni Carmen iti text message a mapapati a naggapu ken ni Leonardo a sarakenna daytoy iti ruar ti South Supermarket iti Bulacan.

Nagturong ni Carmen iti nasao a lugar ngem awan a nagparang ni lakayna. Idi nagteks ken timmawag ken ni lakayna, awanen ti naurayna a sungbat.

Tinawagan ni Carmen ti asawa ti pangulo ni lakayna, ni Prudencio Calubid, ket insungbat ti babai nga indissaagda ni Leonardo iti sanguanan ti pagadalan nga elementaria ti Tuktukan.

Nagdamdamag ni Carmen kadagiti agpaspasada iti traysikel iti South Supermarket ket ditoy a naammuanna a tallo nga armado a lallaki ti nangguyod ken ni lakayna sada inlugan iti maysa a Toyota Revo a lugan a nakaluban ti plakana.

Manipud idin, awanen ti nadamag pay ni Carmen no sadino ti yan ni lakayna, no sibibiag pay wenno intanemen dagiti nangdukot kenkuana.

Ngem suspetsa ni Carmen a ti militar ti adda iti likudan ti pannakaitalaw ti asawana.

Ngamin, kameng ni lakayna iti staff ni Prudencio Calubid, dadaulo a komunista ken consultant ti peace panel ti National Democratic Front, umbrella group dagiti komunista.

Madakamat ditoy nga iti napalabas, adda maiwaywayat a negosiasion iti kappia iti nagbaetan ti gobierno ken ti NDF.

Ngem natungday ti peace talks kalpasan nga inraman ti Estados Unidos, European Union ken dadduma pay a pagilian a terorista ti New People’s Army, armado a takiag ti Communist Party of the Philippines nga idadauluan ni Jose Ma. Sison.

Kinuna dagiti dadaulo ti NDF a sakbayda nga agsubli a makipatang iti kappia iti gobierno, paikkat pay ti turay ti tagna a terorista.

Iti baet dagitoy a kondision ti NDF, mangiwaywayat ti turay addang tapno agsubli ti peace panel ti rebelde a grupo iti negotiating table tapno magun-od metten ti kappia iti nagbaetanda.  

Agingga ita, awan pay ti nagdur-asan dagitoy a tignay ti patangan ti kappia.

Madakamat pay a maysan nga aktibista ni Leonardo uray idi agbasbasa pay laeng iti sekundaria sakbay a naideklara ti Linteg-Militar idi 1972.

Iti biang ni Carmen Ancheta, gapu iti trabaho ni lakayna kas miembro iti peace panel ti NDF, adda pakainaigan ti militar iti panagpukawna.

Sa maysa, segun ken ni Carmen, inyunay-unay ni Leonardo a no agpukaw, ti militar ti akingapuanan.

Nadegdegan ti suspetsa ni Carmen idi nagpukaw met ni Calubid, tallo nga aldaw kalpasan a nagpukaw ti asawana ket ti militar ti mapapati a nangitalaw iti komunista a lider.

Nagkamang ngarud ni Carmen iti Court of Appeals ket dinawatna iti Korte a bilinenna da retired Major Gen. Jovito Palparan, National Security Adviser Norberto Gonzales ken Armed Forces Chief of Staff Gen. Hermogenes Esperon a mangiparuar ken ni Leonardo Ancheta.

Karaman iti petision ni Maj. Gen. Palparan agsipud ta isu ti addaan iti hurisdiksion (idi) iti lugar a mapapati a nakaitalawan ni Leonardo Ancheta.

Ni Palparan ti itudtudo dagiti grupo ti human rights nga adda iti likudan dagiti mapapati a puersado a pannakaitalaw ken panagpukaw ken pannakapapatay dagiti kameng dagiti militante a grupo ken aktibista.

Binirngasan pay dagiti militante a grupo ni Palparan a  “butcher” dagiti mapappapatay ken mapukpukaw nga aktibista ken kameng ti militante a grupo.

Pinaglibakan ni Palparan nga adda pannakainaigna kadagiti pannakaitalaw ken judicial killings kadagiti masuspetsa a komunista a rebelde idinto nga impaganetgetna a dagitoy nga insidente ket aramid met laeng dagiti kannigid a grupo kas paset ti panangdalusda iti grupoda kadagiti “itta” a kamkameng.

Iti petisionna iti korte, indatag ni Carmen nga ebidensiana dagiti balikas dagiti drayber ti traysikel mainaig iti nakitada a pannakaitalaw ni Leonardo.

Ngem gapu iti amakda, saan a kimmanunong dagitoy a dumatagda iti korte tapno agtestigoda iti nakitada a napasamak.

Iti sabali a bangir, insungbat  da Palparan, Gonzales, Esperon, ken dadduma pay a nairaman iti petision a kas respondente,  nga awan iti kustodiada ni Leonardo Ancheta agsipud awan kinapudnona a ti militar ti nangkautibo iti mapukpukaw a kameng ti peace panel.

Kinuna dagiti respondents a “sayangguseng” laeng dagiti ebidensia a naidatag iti korte.

Iti pangngeddengna, imbasura ti CA ti petision ni Carmen Ancheta gapu ta awan uray sangkapirgis nga ebidensia a manginaig kadagiti respondents iti panagpukaw iti asawana.

(Adda tuloyna)