Awanen maipuslit oversized a baboy iti pagpartian

VIGAN CITY – Awanen dagiti oversized a baboy nga aggapu iti biahe a maipuslit a maparti iti pagpartian ti siudad.

Kinuna ni Dr. Arnulfo Quitoriano a nagsardengen ti pannakaiserrek dagiti oversized a baboy manipud iti biahe nga aggapu kadagiti kabangibang a probinsia kalpasan ti panangkumpiskar ti provincial government  ti maysa a naipuslit nga oversized a baboy a maparti iti slaughterhouse ditoy ken pannakaikaso ti nagipuslit.

Gapu iti daytoy nga insidente, imbilin ni Gov. Ryan Singson ti naing-inget a panagmonitor kadagiti oversized a baboy a maiserrek iti quarantine checkpoint iti Bio, Tagudin idinto nga impakatna ti panagbalasa kadagiti agbambantay iti nasao a checkpoint.

Kinuna ni Quitoriano a saan  a problema ti panagkisang dagiti maparti a baboy agsipud ta adu dagiti prime fattener nga aggapu iti sabali a probinsia.#