AWANTON TI PORK BARREL, ‘MARE?

Salaysay ni Judith Simon

 

(Umuna a Paset)

 

AMMOM, ‘Mare, naklaatak kadayta nga aldaw bayat ti panagin-inanak a naglaba. Inwaragawag ti presidentetayo a panawenen a maikkat (ma-abolish) ti Priority Develop-ment Assistance Fund (PDAF) wenno mas am-ammo a pork barrel.

Ngannganiak la ket ngarud natnag iti pagtugtugawak, ‘Mare. Agsisimparat man a saludsod ti simmangbay iti panunotko.

No awanton dayta a ramut ti kunniber iti gobierno, kasa-nonto ngaruden dagiti kasa-pulan dagiti lider a mangpa-pintas, mangparang-ay kadagiti masakupanda?

Maipatungpal ngata dayta? Inton sabalin ti presidente, saanto ngata a maisubli dayta a “paglukmegan” dagiti naalib-tak?

Addanto pay ngata agtaray a senador ken kongresista no awanen ti pork barrel?

Ayna, ‘Mare, kasla ketdin dayta laeng pork barrel ti rason no apay nga addada dagitoy a lidertayo a sipipinget nga agkampania wenno mangarem kadagiti butostayo. Adu pay met, a, ti natarnaw ti gagemda kadagiti kailianda. Sidadaanda nga agsakripisio para iti sapa-sap.

Dagitoy koma ti agtalinaed iti gobierno tapno mariknatay’ dayta napudpudno a panagrang-ay. Ken umadu koma ti kas kadakuada. Ngem madanda-naganak, ‘Mare, ta ammok a dimo ibutbutos dagitoy. Kasano, dika met makaraman iti kas iti ibunbunong (a kuarta) dagiti paboritom a lider. Isu a nasay-sayaat koma lattan a dika agbutbutos.

Kitaem, ‘Mare, kasta unayen ti “panagkurab” dagita a lider iti tulong a para koma kadatayo nga umili. Nagbalin la ket ngarud a nailian (wenno sangalubongan pay ketdin) nga isyo dayta a pork barrel. Nakababain! Uray la napalua ni Cardinal Tagle ka-daytoy makapadul-o nga aramid dagiti lidertayo.

Dita itan a subbotenda dagiti gastosda idi eleksion, ‘Mare. No dimo koma ngamin inawat daydi intanggayada kenka idi panawen ti basingkawel, di kad’ awan koma ti pamkuatanda nga agbutot iti pondo.

Dida pay la agkalamri dagita a lider a nagnumar iti P10 bilion a mapukpukaw a pork barrel!

Isu a nasayaat ta adda whistleblower, ‘Mare, ta naibas-kag, naammuantayo dagiti makapabaliktad iti bagis a garaw dagiti lidertayo.

Masmasdaawak no pangal-alaanda iti tured ta mairusokda ti agaramid iti maikaniwas. Sika, Mare, baka ammom?

Saanda laengen mapanunot ti kaadu dagiti umili a kumar-karamut tapno laeng maisakadda ti panagbiagda iti inaldaw-aldaw. Nakaad-adu dagiti agna-naed iti barongbarong, iti kaeskuateran, kadagiti napeggad a disso ken ti kadaksan, awanan iti bukod a daga ken pagtaengan. An-anusanda ti mangpalabas ti rabii iti sadino man a paka-danonan ti sipnget kadakuada.

Kasta met a ngumatngato ti malnutrision gapu itoy rigat ti kasasaad ti biag.

Ken adu pay a parikut ti pagilian, ‘Mare. Kinakurang iti klasrum dagiti agad-adal; kina-kurang iti pasilidad ken ramit para iti pannakaispal koma dagiti kailian a biktima kadagitoy sumangsangbay a didigra (a gapu man met laengen iti pannakabukibok ti nakaparsuaan dagiti “bukatot” a lider); panagraira dagiti maiparit nga agas; ti ngumatngato a krimen…

No kadagita koma a parikut ti pagilian ti nakaibukbokan dayta nagpukaw a kasla asuk a P10 bilion? Ayna, adu la ketdi ti nagnumar, ‘Mare. Maysaka ditan…

Pork barrel, ania, aya, ti silud-mo ta adu ti mapagbagtitmo?

Daytoy panangiwaragawag ni Presidente Pnoy iti panna-kaikkaten ti pork barrel, kas ninamnama, adu ti di mamati. Addanto kano latta dayta. Laeng, naig-iget ti pannaka-iwayatna.

“Adda la ket agngayemngem ken makagura kadagiti padak a kongresista,” kinuna ni Ispiker Belmonte. “Ngem inton agta-noy, maawatan ken maruam-danto met laeng.”

Wen met ngamin, ‘Mare. Asino met ti di agpungtot ka-dayta a nakaisigudan sa kellaat a maikkat lattan kenkuana? Aglalo ket kuarta daytan.

Pagpabanglo ni Pnoy, adda grupo a nagkuna, Mare. Tallo aldaw ngamin sakbay ti rally kontra iti pork barrel idi inwa-ragawag ti presidente dayta panggepna.

Ipatona a maalana ti rikna dagiti rinibu (no di riniwriw kas kunkuna ti kampania ti Million March to Luneta) nga agwelga kadayta nga aldaw. Kaduana ngaruden ida iti ilablabanda! Malagip a kontra ti presidente iti pannakaikkat ti pork barrel. Isu ngarud nga adu ti nasdaaw iti kellaat a panagbaliw ti pagtaktakderanna.

(Adda tuloyna)