Footer

Ay, agtatakaw dayta!

Ni  Danny B. Antalan

 

Dagiti mannanakaw ti napanunotko nga isurat iti daytoy a gundaway, literal a mannanakaw, saan a figurative.  Saan met a dagiti buaya iti gobierno ti kayatko a sawen.  Uray dagiti mannanakaw ti oras, asawa, ken kapanunotan (wenno plagiarism a naguso gapu ken ni Senador Tito Sotto) ket saan a dagitoy ti puntok.

Ti kayatko a sawen a mannanakaw, dagiti mannibrong, salisi, akyat-bahay, mangngagab, mannipdot ken dadduma pay nga awag kadakuada a mangal-ala iti kuarta, alikamen, sanikua ken gameng nga awan pammalubos ti akinkukua.  Iti ababa a pannao, inlibas.

Saan la a siak ti dumdumlaw, a basta simmagpaten ti bulan nga addaan iti ‘ber’ iti udina, addadtadan, tumarayutoydan a mangbiktima kadagiti piman, kakaasi ken awanan gaway a padada a tao.

Nadumaduma a modus operandi.  Ngem amin, epektibo a mangkurimes iti kuarta ken sanikua.

Dakatamatentayo ti maysa kadagiti uso ita a wagas nga ar-aramiden dagiti Tunnel ken Acetylene Gang. Agabang dagitoy iti kuarto iti asideg ti bangko wenno pawnshop a serkenda.  Magnada iti kanal wenno mangkalida ti abut  agingga a bumatog iti mismo a vault.  Ti siglatda ketdi ta apagisu la unay iti batog ti vault ti pagsardenganda nga agabut. Babaen ti acetylene, luktanda ti vault ket dita a kurimesenda dagiti alahas wenno kuarta.

Dagitoy dagiti grupo ti lallaki.

Adda met grupo dagiti babbai, ngem salisi ti modus operandida.  Agsiputda kadagiti lallakay, babbaket wenno dagiti ammoda a nalaka nga allilawen a mapan ag-withdraw iti bangko.  Intono rummuar ti biktima, salig-saligenda, addanto ti mangdungpar, wenno makipatpatang, sabali met ti mang-slash iti bag, mangkaut iti kuarta, ket santo la madlawan ti biktima nga awanen ti inyaonna iti bangko intono makadanon iti balayda.

Budol-budol met ti style ti dadduma, ta agpammarangda nga adda kayatda a bangonen a negosio ket agbirbirokda iti kasosioda sada iparang ti sangabag a kuarta ken allukoyen ti biktima a makisosio kadakuada agingga a maay-ayo ti biktima ket itednan ti kuartana, wenno alahasna, kasukat ti sangabag a kuarta nga ibati dagiti manangallilaw kas pammatalged (kuno) iti panagtalekda. Agpakadanton dagitoy sada ibati ti bag iti biktima  ken ibaga nga iyurayna ida ta adda laeng nasken nga asikasuenda a sabali. Ania pay, urayton mabisbisinan ti biktima nga aguray kadakuada ket sananto la maammuanen a naloko inton luktanna ti bag ket maduktalanna a pasig a nakarbit a papel laeng ti sukat iti kuartana.

Dagiti met dadduma,  agpammarangda nga adda pawit ti biktimaenda manipud iti anakna iti abroad wenno iti Manila (agtaltalek no kua ti biktima agsipud ta pudno amin dagiti detalye nga ibagbaga dagitoy maipapan iti nagpawit kuno),  sarsaritaanda agingga a maallukoyda daytoy   nga isukatda ti rineppet a kuarta iti biktima a mangipaimanto metten iti kantidad wenno alahas.  Kamaudiananna, maduktalanto laengen ti biktima a nakartib laeng diaryo ti impasirip dagiti manangallilaw a kuarta.

Ken siempre,  di maaw-awan ti panagserrek kadagiti pagtaengan ken negosio establisimiento.  Nagsasaruno a panagtakawan ti nailista ti polisia.  Kuarta, selpon, laptop, alahas ken dadduma pay a sanikua ti kurimesen dagiti mannanakaw.

Ti rigatna, kasla awanen ti panagbuteng dagiti mannanakaw.  Naturtureddan iti daytoy a gundaway.  Nangruna no grupoda nga agtakaw, saanda nga agbuteng a sumrek lattan iti pagtaengan ti biktimaenda.  Adda payen iggemda a paltog ken patadem.  No lumaban ti akinpagtaengan, saanda nga agpangadua a mangpaltog wenno mangbagsol itoy.

Dagiti biktima, ayatda laeng a dida maan-ano wenno madangran, nangruna no adda pamiliada, dida lattan agtagtagari.  Ta no agsaoda, makaramanda met iti disnog wenno kugtar.  Ti rigatna, no adda dagiti ubbingda ket ma-traumada pay iti mapasamak.

(Adda tuloyna)