Ay, Ay, Ay ti Eleksion iti Barangay

(Tuloyna)

 

Diak laeng matukod a panunoten no apay pay la a kasapulan dagitoy a lookout (malaksid iti bentahe dagiti nangala kadakuada) ken watcher. Panagtalek kadagiti mangimaton iti eleksion, dayta laeng ti kasapulan. Mannursuro dagitoy ket saan met ngatan a mapagduaduaan pay ti kredibilidadda. Saanda met ngata a pakibiangan ti resulta. Saanda nga ipalubos a mamulitan ti inan-annadanda a naganda gapu laeng itoy a banag. Propesion, biag ken kinataoda ti nakataya iti tunggal panagserbida iti eleksion.

Ti pay nagalas a panunoten, ti ugali dagiti dadduma a no addan dagiti kandidato, awan man laeng ti prenoda a mangibaga iti merienda wenno mainom. Daytoy ti manglaplapped kadagiti dadduma a mayat koma met nga agserbi ta awan met ti namnamaenda a gastuenda iti kampania. Dakkel a gasto ti panagngayangay iti eleksion! No dida met ngarud makasabay itoy a trend, itoy a kinapudno, pulos a didanto maigasatan ti basingkawel.

Ngem ti nakaay-ayat itay eleksion ti barangay, saanen a kasta a malmalem wenno al-aldaw ti panagkampania dagiti kandidato. Nakasapsapada man. Daytay panawen nga agin-innawkan, daytay kalleppasmo a nangsango iti pammigat wenno ti umas-asuk a kape a napakset a bagas. Daytay panawen nga agkaykaykaykan iti paraangan.

Gayam, tapno saanda a ma-damage iti merienda. Asino ngarud ti mangibaga iti merienda no kalkalpas a namigat? Makaellekak man idi naammuak daytoy a baro nga estratehia dagiti kandidato. Rummuar a talaga dagiti nagpaiduma a sirib no panawen ti basingkawel.

Malagipko ita ‘di padasko iti eleksion ti barangay idi 2007. Addaak idi ti pribado a pagadalan iti ilimi. Makalawas la ti kampania. Gapu ta agisursuroak, sa laeng nakaruarak a nagkampania kadagiti aldaw ti Sabado ken Domingo. A sinolok pay ta nakaadun a nagkampania dagiti kakadua. Ket ditoy a napadasak dagiti nadakamattayo iti ngato.

Ngem ania ngarud ti maitedko a pangmerienda ken pang-inom no buttaw met ti bolsa? Agpayso, agisursuroak kadagidi a panawen ngem pribado met. No pribado kunam ditoy ilimi, apagkatlo laeng iti aw-awaten dagiti adda iti public schools ti sueldomi.

“Kasano ngarud nga ibutosdaka no kasta?” addada nagkuna a kalugaranmi.

Ngem diakon inkankano. No talaga a kayatdak dagiti kalugarak, kinunkunak iti bagik, saan a dayta kaawan ti maitedko kadakuada ti rason tapno didak ibutos.

Ken gapu pay ta awan ti makaut, saanakon a nangala pay  kadagiti lookout ken watcher. Paggastuan laeng. Intalekko lattan kadagiti mannursuro ti amin. Mabaliwan kad’ pay ti pangngeddeng dagiti bumarangay?

Resulta? Maysaak kadagiti dua a natnag iti line-up-mi. Simrek dagiti lima.

Bassit laeng ti diak nakastrekan nupay addaak iti maikasiam a puesto. Asideg laeng ti diperensia.

“No didaka intinnag dagiti kakaduam, nakastrekka,” adda nangikissiim. Idi kano rabii sakbay ti eleksion, nagsasarita dagiti ka-line-up-ko. Gapu ta adda kan’ bassit pagrubuatan a kaamaan, napagnunumuanda a didakon iraman iti maudi nga estratehiada. Binnuldingen ti nagna. No sinuportaran ida ti kaamaak, didak gayam sinuportaran.

Ngem binaybay-akon dayta a naamuak. Inawatko ti resulta.  Kasta laeng ti eleksion, kinunkunak. Ken awan ti nasakit a bakrangko ta saanak a nagkaut iti bolsak (a butbot met). Ken limmabanak a patas. Nalabit saanko pay laeng  a gasat/panawen ti agserbi kadagiti kalugaran.

Adu pay ti estoria tunggal dumteng ti kastoy nga eleksion. Tunggal estoria, adda imetna a pagsarmingan a makatulong iti masakbayan, iti nataltalna nga eleksion iti masanguanan.

Kadagiti di napagasatan itoy a basingkawel, awatenda koma a sipupuso. Baliwanda ti mangrugi. Saan a kemkemen iti barukong ti pannakaabakda.

Kadagiti met napagasatan, ipakitada koma ti napaypayso a kaipapanan ti panagserbi. #