Ay, nakababain! (Maudi a paset)

Sakbayna, iti maysa nga interbio ken ni Villafuerte, kunana a pammadakes laeng daytoy kenkuana dagiti mayat a mangagaw iti puestona. Impasingkedna nga agawid iti pagilian tapno mailawlawagna met ti biangna.

Ket di pay nakaaw-awid, maysan a bideo ti rimmuar. Buklen ti bideo dagiti kadaraantayo met laeng nga OFW idiay Saudi Arabia nga agkunkuna a nasingpet, adu ti natulongan ni Villafuerte a Pinoy iti sakupna. Ket dida mamati a maaramidna ti ipabpabasolda kenkuana.

Kabayatan a maur-uray ti panagawid ni Villafuerte, magmagna metten ti gobierno ditoy tapno mapapardas ti pannakaammo ti kinapudno. Naalaanen iti statement dagiti biktima iti sangauanan da Lea Fortuna, mangidadaulo iti grupo dagiti agim-imbestiga a taga-DOLE, ken Ophelia Almenario ti Overseas Workers Welfare Administration.

Inaklon ni Albert del Rosario, sekretario ti Department of Foreign Affairs a nakompirmardan ti kaadda a talaga daytoy nga iskema ti sex-for-flight. Laeng ta awan dagiti rumrummuar wenno mayat nga agsao a biktima. Ket ita ta naibutaktaken daytoy a pasamak, impasiguradona ti pannakaipataw ti umisu a pannusa kadagiti mapaneknekan a nagbasol nga opisial.

Napintas la unay dayta. Mangipakita laeng a sinsero ti gobierno iti pannakaipatungpal ti reporma iti ania man a sektor tapno agtultuloy dayta “nalinteg a dalan” a sursuroten kano ita ti pagilian.

Asino ti di mangayat iti dayta?

Iti koma ngarud pannakakali ti kinapudno, saan laeng a ningas kugon dayta pannusa a maipataw kadagiti nagbasol. Masigurado koma ti pannakaited ti umno a hustisia kadagiti biktima.

Pudno la unay a nakababain daytoy a pagteng iti imahen ti pagiliantayo kadagiti ganggannaet. Masapul ti naan-anay a pannakadalus iti grupo dagiti opisial manipud iti ngato agingga iti kababaan. Dayta, a, no kayattayo ti naulimek, naranga ken madaydayaw a pagilian.

Magun-odtayo laeng amin dagitoy no ammotayo nga utoben ti bagbagitayo. Agpayso la unay, adda iti bukodtayo a kinatao ti pannakagun-od ti balligi wenno pannakapaay kadagiti arapaap.

Kadagiti kadaraan nga OFW, sitatalinaedda koma a natibker iti kinataoda. Pudno man met a narigat ti mayadayo kadagiti patpatgen. Ngem saan a daytoy ti rason tapno makaaramid iti maikaniwas iti linteg ti tao ken iti linteg ti Namarsua.

Saanen a mailinged kadatayo ti kinapudno nga addada dagiti kakabsattayo nga OFW a mangmulmulit iti sinapataanda iti sango ti altar idi awatenda ti maikapito a sakramento (ngem ad-adu ketdi dagiti manakem). Addada dita a maki-one night stand kadagiti makasingedda iti dar-ayanda a pasken wenno ragragsak no panawen ti day-off-da.

Pangleplep iti iliwda?

No utoben ngarud, mabalin a maysa daytoy a rason no apay a natured la unay dagiti ganggannaet a mangibaga iti kaykayatda kadagiti kadaraantayo ta adda met madamdamagda a kasta a pasamak… a di adayo a napadasandan. Ket dagiti payen mismo nga opisialtayo ti diretsoenda a kasarita itoy a nakadurdurmen nga aramidda.   Sabali laeng met a pakasaritaan dagiti kadaraantayo a biktima ti sex trafficking kadagiti nadumaduma a pagilian. Kaaduan kadagitoy ti illegal a simrek a nagtrabaho iti ballasiw-taaw. Ginundawayanda ti naikari a nalaka nga iseserrek nga agtrabaho iti maysa a pagilian a no palausen ti manarita, dida payen naggasto.

Kaudian a damag mainaig itoy ti pannakaispal dagiti kadaraantayo a biktima ti human trafficking nga agtrabtrabaho iti Baila Me Karaoke Bar idiay Bintulu, Sarawak, Malaysia. Narekrut kano dagitoy a kas service crew. Ngem nagtungpalda a sex workers.

Agyamantayo kadagiti Malaysian police ta tinulongandatayo iti panangakkaltayo kadagitoy a kadaraantayo iti ima dagiti mananggundaway, kinuna ni Sec. Rosalinda Baldoz ti DOLE.

Sumagmamano laeng dagitoy kadagiti ramen ti panagdiaspora ni Pinoy iti sabali a pagilian. Paset amin dagitoy  iti panamagbalinna a natibker. Ngem saan koma metten a dagiti mismo a kadaraanna ti mangirarem kenkuana iti lubnak.

Ta nakababain!#