Ay, nakababain! (Umuna a paset)

PAGAAMMO iti sangalubongan ti pagiliantayo a Pilipinas a pagtataudan dagiti de-kalidad a mangmangged. Paggugusto dagiti sabali a puli dagiti kadaraantayo nga agserbi kadakuada. Ta pudno man met a nagagetda ket awan ti pagkunaam iti trabahoda.

Isu ngarud a kasta la unayen ti panangdaydayaw kadatayo dagiti sabsabali a pagilian!

Ngem yanna nga adat ita, adtoy ti nakababain a damag. Biktima dagiti kadaraantayo nga OFW (Overseas Filipino Workers) iti aw-awaganda iti sex-for-flight— ‘tay makiinnayatka iti ganggannaet a nakaammo iti pannakapaadda ti tiketmo tapno makaawidkan iti Pilipinas. Ti yanna pay nga adat, mismo kano a dagiti opisialtayo a pagkamanganda koma iti nakaisadsadanda a lugar ti mangibugbugaw kadakuada.

Immuna nga imbutaktak ni Akbayan Rep. Waldon Bello daytoy a pasamak iti maysa nga interbio kenkuana iti radio itay Hunio. Segun ken ni Bello, maysa nga OFW (a nailinged iti nagan a ‘Michelle’) ti nakaammuanna kadaytoy a mapaspasamak kadagiti kadaraantayo iti Middle East.

Iti panangistoria ni Michelle, maysa nga aburido ken agparparikut la unay nga OFW gapu iti kinaabusado dagiti nagbalin nga amona, immasideg daytoy  ken ni Assistant Labor Attaché Antonio Villafuerte ti Philippine Overseas Labor Office (POLO) sadiay Riyadh, Saudi Arabia tapno agpatulong.

Kas maysa nga opisial, inkari kano ni Villafuerte ti tulongna. Ket iti maysa nga aldaw, nagsubli ni Michelle iti opisina ti nasao nga opisial tapno alaennan ti tiketna tapno makasublin ditoy pagiliantayo. Kaykayatna laengen ti agawid ngem ti nakakaasi iti sidong ti amona. Bay-annan a panunoten dagiti di pay nabayadan nga utangna a nagtayab.

Ngem ti nakas-ang, idi alaenna ti tiket ken ni Villafuerte, addaanen daytoy iti kondision. Masapul a maki-one night stand iti maysa nga Egyptian a nanggatang iti tiketna. Ti yanna pay a pagdaksan, nag-take advantage kano nga umuna kenkuana ni Villafuerte.

Nupay kasta, saan a basta lattan timmulok ni Michelle. Inrupirna ti kalinteganna. Naasian kenkuana ti Egyptian a pakaisagutanna koma ket saan a natuloy ti panangikut daytoy kenkuana.

Nalawag itoy, no pudno man, nga inusar ni Villafuerte ti posision/bilegna tapno ikuspilna dagiti kadaraanna. Banag a no mapaneknekan, dakkel a panaglabsing iti linteg ti mabalin a sanguenna.

Ita a masursurat daytoy, sabali manen a biktima kano ni Villafuerte ti situtured a nagtestigo kontra kenkuana. Ta isuda a mismo, biktima ti iskema a sex-for-flight. Inkidemda kano daytoy ayatda laeng a makaawid a dagus tapno maadaywanda dagiti awanan kararua nga amoda ken makadennadan ti pamiliada a kailiwda unayen.

Kayatda ti agtukiad, ngem  awan ti naaramidanda.

Iti panangisalaysay ni ‘Angel’ a maysa kadagiti biktima, inasitganna kano ni Villafuerte ta kayatna ti agpatulong. Ngem inyopresar kano ketdin daytoy ti panamagbalinna a sex partner sakbay a naan-anay a makaawid ditoy pagiliantayo.

Nagbalin kano pay ti opisial a binabastos ti panagsaona ken abusado la unay a makisarsarita.

Dagitoy a damag, dinayyegna ti sibubukel a pagilian. Naalarma ti gobierno ket pinagtignayna dagiti ahensia a maseknan itoy.

Ita a masursurat daytoy, mapagpagawiden ni Villafuerte, 49, nagpaay iti DOLE-National Conciliation and Mediation Board, administrative assistant iti POLO idiay Kaohsiung, Taiwan ken patanor ti Tabuk, Kalinga, tapno sungbatanna dagiti pammabasol kenkuana.

(Adda tuloyna)