Ay pati nagan ken adresko, ineditda, kailian!

Ni Jimmy M. Agpalo, Jr
(Tuloyna)
KADAGITI simmarsaruno a manuskrito, no kasano ti kapaspasko a mangipaw-it, napaspaspas metten nga agsubli! Ngem gayam, dimmakkel ti ulok, limmastogak. Ket nalipatak nga agdadamoak gayam. Inggaedko ti nagbasabasa kadagiti libro maipapan iti literatura. Sukisok, reserts. Eksperimento, panagdidilig.

Impablaak manen ti Bannawag dagiti suratek.

Napanak iti radio idi 1992. Nagsuratak iti drama. Adu nga uyot da apo Juan S.P. Hidalgo, Jr. ken ni Cles Rambaud nga agsuratak latta iti Bannawag. Ngem imbagak nga agsubliakto no maumaak iti radio.

Manipud 1986 a nangrugiak a nagsurat agingga iti 1994, nakaawatak iti uppat a pammadayaw manipud iti Dakilang Ugat Awards 1986 (daniw), GEBLA 1990 (sarita), ken dua ti COVILLA (daniw).

Idi 1995 a nagsubliak nga agsurat iti sarita ken daniw. Nakikontesak, ket uppat nga award ti inawatko iti maymaysa a tawen! (dua iti GUMIL Pangasinan, sarita ken daniw; GUMIL California, sarita; ken COVILLA, daniw). Gimmatangak metten iti bukodko a makinilia ta bumulbulodak laeng. Premiadoak a mannurat ngem awan pay la ti bukodko a makinilia, sus! Sapay no di tugtugkel ti ammok, he-he…!

Manipud idi 1995 agingga iti 2002, tinawenen nga umawatak iti pammadayaw, kailian. Basta makikontesak, mangabakak. Ket inabakko pay ni apo Reynaldo A. Duque iti Palanca Awards 2000 iti sarita! Kailian, uppat pay laeng a mannurat ti nakaibalat ken ni apo Duque: ni apo Samuel Corpuz, apo Ric Agnes, Linda Lingbaoan-Bulong ken siak.

Iti umuna pay laeng a daniwko iti Filipino nangabaken iti 1st Prize!

Iti imasna, nadlawko idi 1998, nga editen metten ti Bannawag ti nagan ken adresko! Jimmy M. Agpalo, Jr., 125 Engineer’s Hill, Baguio City ti insuratko, ngem no rummuaren, ne, ay, ta Jaime M. Agpalo, Jr., San Antonio, Narvacan, Ilocos Sur metten! Ulitek latta ti agipatulod iti manuskrito, ne, Jaime latta ti isuratda, saan a Jimmy. Ket no mangabakak iti pasalip, San Antonio, Narvacan, Ilocos Sur ti maikabil, saan a Baguio City. Ala, ket premiadoak pay a mannuraten.

Uray iti Home Life Magasin, ti kalatakan a Catholic magazine, kastoy met ti insurat ti editor: Jimmy (Jaime) Agpalo, Jr., from Narvacan, Ilocos Sur…

Agririak koma, a, kailian, ngem adda puntos dagiti editor. Nalabit, kayatda a maidayaw met ti ili a nakaiyanakak a saan laeng a ti ili a pagnaedak. Daytoy ti diak napanunot idi. Ket agyamanak unay ta ineditda. Ta naedit man ti nagan ken adresko, isu met la nga isu a kukuak ti manuskrito, saan? Siak met laeng ti maidayaw. Husto ti inaramid dagiti editor!

No napasugkianak idi ineditda ti daniwko, saanak koma met a nagbalin a premiado a mannurat. Manipud idi 1986 agingga ita a tawen 2002, sangapulo ket innemen (16) a tawen nga agsursuratak, addan sangapulo ket siam (19) a pammadayaw nga inawatko. Nalalaingak itan ngem dagiti nagedit iti immuna a sinuratko ta sangapulo ket siam (19) nga awards ti inawatkon idinto ta isuda ket awan pay, ken siak ti manged-editen kadagiti sinuratda ta maysaakon nga editor! Katawaak met idan no di agsursurot dagiti ramen ti suratenda a daniw wenno sarita. Nagbaliwen ti yabayab ti angin, kailian!

(Adda tuloyna)