sinursuran-banner-sqSinursuranNi Jobert M. Pacnis

Ayannan Ngay?

Kolum : Sinursuran

Ni Jobert M. Pacnis

  (Maudi a paset)

 

Apay ngay a dagiti agindeg ti dagus a natupar?

Daytoy nalatak a brodkaster, sinapulna dagiti opisiales ti barangay ngem awan ti simmango kenkuana ta naglelemmengda ket napanda iti kabangibang nga ili (saan laeng a barangay). Isu a kasta ti napasamak.

Permi a panagala iti bideo daytoy a brodkaster. Pinanggepna pay a kinasarita dagiti naimatanganna a Chinese nationals ngem tinarayanda laeng. Gapu itoy, dagiti agindegen ti ininterbiona.

Sakbay ken kabayatan ti idadateng daytoy a brodkaster, kasta unay manen ti panagbunag dagiti agminminas iti magnetite. Ibiaheda daytoy nga ipa-Sta Ana tapno ditoy nga iluganda kadagiti nakapondo a barko a maibiahe iti ballasiw-taaw.

Idi makapanawen ti brodkaster, a nangipanamnamaanna ti pannakaipabuya iti nasional a telebision dagiti naduktalanna, agsasaruno manen a nagruar dagidi naglelemmeng a bagon (a naalaan met laeng iti bideo ta nai-tip no naglelemmenganda) tapno bunagenda amin a naaramiddan a “nangisit a bantay.” Uray rabrabii, aguanta ‘ta bunag. Idi awan nabatin, insardengda pay laeng ti nagkurob iti darat.

Pinadaanan dagiti umili ti damag iti telebision. Ngem tallo lawasen ti napalabas, saan met laengen a maiparuar. Nagaburanen iti nagsasaruno a kalamidad (manipud ken ni Labuyo, pannakabangga ti maysa a barko, sa ti Habagat ken ni Maring). Ala, nasayaat laeng no kasta.

Ngem ketdi, agngayngayemngemen dagiti umili kadayta a brodkaster. Natapalanen, kunkunada. Ta apaman gayam a naggapu iti barangayda, nagturong iti ama-ti-ili tapno interbioenna met daytoy. Kasta ngata?

Am-ammo met ngarud a ti ama-ti-ili, suportadona dagitoy nga agminminas. Kaduana dagiti adda iti babaenna a pakairamanan dagiti opisial ti barangay.

Ti saludsod dagiti agindeg, ‘yannan ngay daydi kari ti brodkaster nga irakurakna ti dakes a mapaspasamak itoy nga ili? A babaen kenkuana, manamnama a mapabutngan dagiti adda iti likudan ti panagminas ket saandan nga ituloy ti mangdadael pay iti nakaparsuaan nupay suportado ida dagiti politiko.

Saan laeng a dayta pannakadadael ti nakaparsuaan ti nakaam-amak ditoy. Madakamat pay ti gamat a mabalin a mangrippuog iti kinatao ti tunggal agindeg kadayta a disso.

Kasano ken apay?

Iti gartem ti lasag dagitoy a Chinese nationals, regular ti panagpasapulda kadagiti kalapati a nababa iti tayabna. Ti makadakes, makitkita daytoy dagiti naganus pay ti pampanunotna a lumugar. Saan ngarud nga adayo a dakkel ti epekto daytoy iti pannakamuli ti kinataona. A negatibo pay met ngarud!

Ti makadakes, no agrairanto iti kasta unay dayta prostitution.

Daytoy koma ita ti kitaen dagiti agtuturay. Saan a dayta panagakupda iti kuarta a kas supapak ti panangpalugodda kadagitoy a ganggannaet a mangbukibok iti kinabaknang ti pagilian. Ita pay laeng, makitkitan ti dakes nga epektona. Nagdarasen ti pannakasakup dagiti kabalbalayan.

Ti invaders? Ti mismo a baybay! Mapukpukawen dagiti sarikedked a mangatipa iti panaglang-ay ti dalluyon. Saan a maliklikan daytoy a panagpangato ti level ti taaw gapu iti climate change. Saan koma ngaruden a nayonan pay dagiti agtuturay ti makagapu ti pannakadadael ti aglawlaw. Kitaenda ketdi no kasano a masolbar dagitoy sangsanguentayo a peggad.

Ngem dakkel a panagyaman dagiti umili ta itay laeng Agosto 27-28, nairakuraken ti damage. Nagbalin a responsible ti brodkaster. Iruarna dayta alana a damag ken paspasamak iti sulinek a barangay a napananna. Ta nupay kasano kinanumo dagiti agindeg a nadanonna dita, inikkanna ida iti pateg. Ta taoda a nakasaritana. Sabagay, dati  a public servant iti pagilian!

Ngem agurayka… iti pannakasursurat daytoy, agsasaruno manen dagiti bagon nga agturong iti mining site a binisita ti brodkaster. Mapanda ngata manen ubraen? Padamagankayto, ka-Sinursuran.#