Ayat babaen ti textmate (Maudi a paset)

MANGITURTURONG

Sakbay a bumara ti tungtongan
Dagiti dua a nagsalisal iti patangan
Intay pay ida ngarud ballaetan
Ken usigen dagiti inda nagsubangan

Ni babai inna latta ikalintegan
Ti riknana a nadarisay ken awan mulitnan
Paikallaysa latta ken katextmet a kunanan
Uray pay no daytoy ket dida pay nagkitan

Saan a napateg kenkuana ti pisikal a bagi
No daytoy ket nagkamtud ken katextmet, adi
Naindaklan nga ayat ngarud inna ikarkari
A supapak iti dina pay nakita a lalaki

Ni lalaki met kunana nga indarirag
Dayta nga aramid kano ket minamaag
Isu ngarud a timekna ti agublag
Ngem ni babai di paupay
Ta takderanna kano ti saona, kunana pay

Ngarud intay man pay ida denggen
Ti rasonda pay no daytoy ket natangken
Ta intay met adalen ken butingtingen
Ti imbanatda a sao a narangen

Daytanto met iti intayto panghusgaan
No asino kadakuada iti makoronaan
kakabsat a tallaong rugianyon, alan
Iti agpili kadakuada no asino kalaingan
Kadakuada a nga agikalintegan

LALAKI

Basta diak umayon iti ibagbagam, adingko
Diak a mairusok dayta nga aramidmo
Saan nga aramid dayta ti Ilokana a naemma
No di ket aramid ti burburkiada!

BABAI

Ad-adda a madi nga aramid iti panagatras
Lalo iti kari ni ayat ta iti puso ket makaipas

LALAKI

Adun dagiti nabasak iti dyario
Nga aramid ni katextmet a linoloko
Adda tay nagkitada dayta a tao
Ngem ni babai rineypna laeng ken inabuso

Adda pay ti nagpammarang dita
Nakipagkita ni babai kenkuana
Ngem holdaper gayam naitaray kuartana
Naitaray pay selponna

BABAI

Saan amin a tao ket agpapada
No adda man dagita demonio nga inka nakuna
Adda met dagiti anghel a kas ken kaliwanliwa
A ti textna ket binatog ti nasam-it a sonata

LALAKI

Ala no dayta rasonmo ket ipapilitmo
Sungbatam ngarud man daytoy a saludsodko
No talaga a napudno unay dayta a manongmo
Ik-ikkam kadi ti load-na dayta inka kadindinnungngo

BABAI

Ti tao a mangipatpateg ken agay-ayat unay
Itedna amin a pagragsakan ken ni lab awan sarday
Ta kasta la ngarud ti agayat a nagsaway
Amin-amin ket ited ken di agliway

LALAKI

Daytoyen ti kunkunak, patgen a kabaddungalan
No sika ti mangited kenkuana iti load sabali daytan
Amangan no saan laeng a dayta iti inna gamgaman
No diket innaka pay mulitan ken sikapan

Isu a sakbay a dawatannaka iti ad-adu
Ta kasta ngarud ti aramid ti sindikato
Paayatenda, pangnamnamaenda ti biktimada
Bulatsingen, armen ken allilawen ida
Ngem iti ungtona adda sabali a panggepda

BABAI

Siguradoak a saan a kasta ni katextmetko
Ti panagayatna ket ammok a napudno
Isu ngarud a nga agawis iti kallaysa
A pammanekneknek nadarisay a panagayatna

MANGITURTURONG

Dayta man ngarud ti nagultimoan, papagayam
Ti nabara a saritaan dagiti nagbukangen
No asino iti nangabak diak ida masinuo
Isu ngarud a yawatko ti pangngeddeng kadakayo
No asino iti nalalaing nga agrason
Dakayo la koman iti makaammon

Ngem maibalakadko man ken ading balasang
Kinapudno ti baro nasken a mapaneknekan
Lalona ti ugali ta sabali ket iti tungtongam
Ammom aya no nalaing a sumao ngem sadut gayam
Santo pay la barumbado, ay, sabali gayam
Iti aramid iti sauna, adda tao a kasta gayam

Tapno maammuan no sino ti nalalaing kadakuada
Innadduan iti palakpak ken dir-i kadakayo nga agbuybuya
Ket daytoy ngarud ti damagek kadakayo a sangapada:

Asino ti mangayat ken ni babai/or nagan? (wait for the audience’ response)

Asino ti mangayat ken ni lalaki/or nagan? (wait for the audience’ response)

NOTE: Ideklara ti mangabak no nakadkadlaw, tabla no saan a makadesidir…