: Ayat babaen ti textmate (Umuna a paset) | Tawid News Magazine - Weekly Ilocos News 📰

Ayat babaen ti textmate (Umuna a paset)

EMCEE: (OPTIONAL)

TEMA A PAGSALISALANDA:

Adda kano katext ni babai. Nagarem daytoy a katext. Sinungbatan met ni babai ti ayat toy lalaki. Saanda pay a nagkita ngem yaw-awisen ni lalaki iti inda
panagkallaysa. Rumbeng kadi a makikallaysa ni babai wenno saan?

DAGITI AGAKEM:

PRINSESA TI BUKANEGAN
PRINSEPE TI BUKANEGAN
MANGITURTURONG

(INTRO: Dungdungoenkanto unay-unay ..)

MANGITURTURONG

Sakbay man iti amin, kablaawandakayo.
Iti naimbag a kanito wenno orasyo,
Kadakayo amin nga immay timmallaong
Kadaytoy bukanegan a nailungalong
Pagraragsakan ti amin a naisar-ong
Iti panagpiesta tI Tubao, ingungoten nga ili
Ti idadanggayyo nalaus unay ti yamanmi
Ti regget ken anusyo nga awan naisupadi

Siak ni (nagan ti mangiturturong) ti napusgan
A mangiturong kadaytoy a bukanegan
Ket ibaskagko ngaruden ti tema a pagsubangan
Ti nalibnos a balasang ti bukanegan’
Isu awan sabali ni (nagan) a kapintasan
Ken manong baro, ni (nagan) a katataeran

Ti tema nga inda pagsalipan gagayyemmi ida
Ni babai adda kano katextmatena
Nagarem ni lalaki sinungbatanna metten a
Ta nakarikna met iti ayat a naisalumina
Di makaturog iti rabii agingga agsapa
Ti linaon isipna ket ni dearest a katextmetna
Di makapangan agingga di makabasa
Iti nakasamsam-it a text ni kaliwanliwana
Ket ita a tallopulo ket tallo nga edadna
Naregregen iti kalendario a kunada
Ngem isu met ti panagtubo dagiti kamurona
Di kad pasimudaag ti ayat dayta?

Ket kadagiti mahilig unay nga agtext dita
Adtoy man ti kapintasan nga agpaay kenka
Makapidutka iti adal ken liwliwa
Maiwanwanka pay ken maaddaan kappia.
Ngem sakbay man nga awagak ida nga umay agtinnupa
Makapleng koma a sipsipat ti intay ipasabat kadakuada.

(then…)
Ket ita, kakailian, dimtengen ti kanito a mangipaneknek
Ti abilidad dagitoy agsalisal, langada’t nakaregregget
Denggentay man ngarud iti inda, ipaganetget
Satayto husgaan no sinno’t nangabak wenno naparmek.

Ikiskissiimda man a babai ti umuna kano
Santo sungbatan ni lalaki a naguapo
Isu a patudonek nga umuna ‘toy balasang a dramaturgo
Mangitandudo iti Literatura Ilokana iti Tubao nga ilitayo!

Balasang, rugiamon nga ibinsabinsan
Ti natibker a rasonmo iti inkayo pagsalisalan
Ta magagaranen ti tallaong piman
Kakabsat ken gagayyem intay man ngarud palakpakan

BABAI:

Napaayak idin ken ni ayat
Saan laeng namindua no di ket namimpat
Toy pusok ti saemna ta nabriat
Arigna impatayko ti linak-am a rigrigat

Ti luak a nagarabus awanan kasimpait
Iti nagan ni ayat anian a nagladingit
Ta kunkunak man siak la koman tay nabagtit
Tapno diakon marikna ti kinaulpit

Ket ita, ni ayat nagtuktok manen
Ti pusok a naidasay ket nagungaren
Linapdak ta diak kayat ti masaktanen
Ngem dagiti text ni katextmet nagsasam-iten
Isu nga ulit-ulitek pay nga inda basaen
Ti selponko innak pay ag-agkanen
Ket rinabiin a nasasam-it matagtagainepen
Toy isipko talaga natalingenngen

Ket ita yarungaingna inkam panagkallaysa
Uray pay no dikam pulos a nagkita
Mayatakon ket diakon agpangngadua
Ta amangan no ibabawina, siak laket ngarud nakanganga
Agamusay iti subsob, maulit manen nga agsagaba

MANGITURTURONG

Madinakanon ti agsagaba ni ading balasang
Isu a kayatnan ti agpasurong iti altar a kunadan
Nupay dida pay nagsarak ken katextna
Kangrunaan a rasonna ti marikriknana
Ammona, ken ammona nga agayat ken katextna
Isu daytoy ti ilabanna ken nagbatayanna
Ilabanna ti panagayatna aginggat-inggana

Ti nataraki a baro patakderentay met ita
Denggentay met no ania ti inna makuna
No apay a di rumbeng a makiasawa
Ni balasang iti katextmetna
Ti natibong a palakpak ipasabat kenkuana

[ Adda tuloyna ]