Ayat ken kappia ti agari koma ita a Paskua

NANGRUGIN idi kalman ti Misa de Gallo kadagiti Katoliko a rugi ti siam a parbangon a Misa agingga iti kaaldawan ti Paskua inton Disiembre 25. Nangrugin ti alimpatok ti panagrambak iti daytoy a karagsakan a tiempo ti tawen.

Iti sango dagiti agtultuloy a riribuk, terorismo, epidemia ti sakit, bisin, nakaro a rigat ken saan a panagkikinnaawatan dagiti lider dagiti pagilian, pannakarikna iti ayat, kappia ken ragsak a kaipapanan ti selebrasion ti tartarigagayan dagiti tattao iti sangalubongan nangruna dagiti Kristiano a mangramrambak iti pannakaipasngay ni Niño Jesus a Mesias.

Iti Pilipinas, tarigagayan dagiti kaaduan a Pilipino a marikna ti panagari ti espiritu daytoy a tiempo – saan laeng a dagiti Kristiano ngem uray pay dagiti kameng iti sabali a relihion – gapu ta agpapadada a mairanud kadagiti pagimbagan a gubuayen ti Paskua.

Ita a panawen, marikna dagiti kadawyan a Pilipino ti karigat ti panagbiag gapu ti itatayok ti presio dagiti kangrunaan a magatgatang. Umadu met dagiti paggastosan ti gobierno ken dagiti pribado a tattao gapu kadagiti panagrambak, panagisagut ken dadduma pay a gannuat a pakaaramatan dagiti nasapulan ken naawat a benepisio. Nagasat dagiti Pilipino nga addaan iti pagsapulan ken pagsanggiranda iti panagbiagda ta ita a tiempo ket adda dagiti material a grasia maawatda. Daksanggasat met dagiti kaaduan a Pilipino a napanglaw ta mapaidamanda kadagiti material a banag iti Paskua kabayatan nga agragragsak ken agpappapas dagiti dadduma.

Iti panagrambak ti Paskua, mapaliiw ti dakkel a nagdumaan dagiti awanan ken adda mabalinna. Nakakaasi ti biag dagiti napanglaw kas kadagiti agpalpalama kadagiti kalsada ken mangbalaybalay no dumtengen ti panawen ti Paskua. Ita a tiempo, umadu dagiti ubbing kadagiti kalsada a makipaskua wenno makilimos. Umadu dagiti katutubo a tattao a mapan kadagiti siudad ken patad tapno agdawatda iti tulong kadagiti nasaysayaat ti kasasaadna iti biag.

Nakaay-ay-ay ti kasasaad dagiti adu a Badjao, Aeta ken dadduma pay a katutubo a Pilipino nga ubba-ubbada dagiti maladaga ken babassit nga annakda nga agpalpalama wenno dumawat ti sangkabassit a paskuaen wenno aginaldoda. Saanda nga iginggina ti pudot iti aldaw ti panagpasiarda kadagiti kalsada, ken ti lam-ek iti panagturogda iti uray sadinoman a lugar nga umiananda.

Iti laksid ti ipampanakkel ti gobierno a dumurdur-as ti ekonomia, tinawentawen latta nga adu dagiti napanglaw a makipalpalama kadagiti kalsada no kastoy a tiempo ti Paskua. Binilion a pondo ti pagririkiaran dagiti opisial ti gobierno – dagiti kameng ti gabinete ni Presidente Rodrigo Duterte ken dagiti miembro iti Kongreso – gapu kadagiti naisapit a “pork barrel fund” iti Proposed 2019 P3.7 Trillion National Budget a nayalokar kadagiti sumagmamano a distrito dagiti kongresista, uray indeklaran ti Korte Suprema nga illegal ti pork barrel. Ngem saan met a mabenbenipisiaran dagiti daksanggasat a katutubo a Pilipino.

Agingga a saan a magibusan ti kinamanagimbubukod dagiti adu a Pilipino nangruna dagiti lider ti gobierno ken dagiti akinkukua kadagiti dadakkel a negosio, agtultuloy latta a saan a marikna dagiti napanglaw ti naan-anay nga espiritu ti Paskua. Kasano a mariknada ti ayat, kappia ken ragsak, no agkirkirausen iti bisin dagiti bitukada, wenno agrungrungaaben dagiti maladaga nga annakda gapu iti bisin wenno lam-ek iti kalnaawan a pagturoganda?

Nagkas-ang a pasamak ta iti laksid a maramrambakan ti Paskua ket agtultuloy dagiti nangduduma a krimen nangruna dagiti pammapatay. Awan sarday dagiti mapappapatay nangruna dagiti napanglaw ken awanan-gaway iti nadara a kampania ti gobierno kontra illegal a droga. Nakaskasdaaw nga iti laksid a rinibun dagiti nakettel a biag iti kampania kontra-droga ngem nagraira latta daytoy a bisio gapu ti pannikunsabo dagiti drug lord kadagiti rinuker nga opisial ti gobierno, kas ipaneknek ti pannakaiserrek iti Bureau of Customs ti P6.4 billion ti balorna a droga itay 2017, ken ti P6.8 billion ti balorna a droga ita a 2018.

Agtultuloy dagiti ranget iti nagbaetan dagiti tropa ti gobierno ken dagiti rebelde a komunista kadagiti probinsia ken nasulinek a lugar. Nagraira met latta ti pangta ti terorismo iti nagduduma a paset ti Mindanao a gapu ti nangkiddawan manen ni Presidente Duterte iti pannakapaatiddog ti deklarasion ti Martial Law iti dayta a paset ti pagilian tapno magun-od ti mataginayon a kappia.

Uray no panawen ti Paskua, nangrugi metten ti pinniltak dagiti politiko nga agsasalisal para iti eleksion inton Mayo 13, 2019. Maaramat pay ti Paskua a rason tapno maay-ayo ken mapasuksokan dagiti tattao babaen kadagiti maiwaras a kuarta, pondo ken regalo.

Nagsakit a panunoten nga iti laksid a ramrambakan dagiti kaaduan a Pilipino – dagiti Kristiano Katoliko – ti pannakaipasngay ni Apo Jesucristo – ket agtultuloy met ti panagbasbassawang ni Presidente Duterte iti pagrukbabanda a Dios, ken kadagiti lider ti Simbaan Katolika nangruna kadagiti obispo ken papadi. Iti sango ti pannakapaspastidiar dagiti lider ti Simbaan Katolika, iyaw-awisda kadagiti mamati ti panangikarkararagda iti Presidente tapno tignayen ti Dios a mangitrabaho ti panagkaykaysa ken sapasap a pagimbagan, imbes a saan a panagkikinnaawatan ken panagsisina.

Iti laksid dagitoy a dakes a pasamak iti panawen ti Paskua, natibker latta ti pammati dagiti Kristiano – Katoliko iti Dios, ken agtultuloy ti panangikarkararagda ken ni Apo Jesucristo nga agari koma iti intero a lubong ti espiritu ti Paskua. (Eden Alviar)