Ayat ti Isangbay ti Paskua

Sarita ni Salvador A. Espejo

(Maudi iti dua a paset)

Pinerrengko ni Beth. Kasla diak patien a daytoy nakaem-emma a babai ket kumuyog lattan iti dina am-ammo a lalaki.

β€œDinak kadi kayat a kaduaen?”

β€œSaan man,” nakunak. β€œNgem nasapa pay. Agpalnedta pay β€˜ti oras ditoy.”

β€œOk, you’re the boss.”

Pinanurnormi ti sementado a dalan iti sikigan ti dan-aw. Inyawis ni Beth ti panagbilogmi.

Pinaliiwko ni Beth. Naragsak a kasarsarita. Ngem apay a naliday dagiti matana?

Idi maumakami a nagbilog, binallasiwmi ti napanayag a karuotan. Nagsagawisiw ni Beth idi makitana ti kotsek.

β€œPapananta?” inamadko idi agtartarayen ti lugan.

β€œUray sadino!” insungbat ni Beth.

Pakawala daytoy, naisipko.

Napankami iti The Flame, nalatak a night club iti ruar ti siudad. Immaklili kaniak ni Beth idi sumrekkami. Sinabatnakami ti naragsak a kanta ti Paskua ni Susan Boyle.

Pinilik ti lamisaan iti suli. Nagbilinak iti serbesa ken ladies drink.

β€œToast,” kinuna ni Beth ket intik-olna ti basona iti basok. Naggiddankami a nangituyag. Ngem nasiputak ti limed a panagrupangetna idi tilmonenna ti arak. Ammok lattan a saan a sanay nga uminom iti arak.

β€œDitoy Vigan ti dimmakkelak,” nakunak. β€œNgem dika nasalsalapon kadagiti aniaman a pasken.”

β€œKorek! Taga-Baguio-ak. Nanglukat ni Papang iti negosiona ditoy Vigan idi kanikatlo a bulan laeng. Nadamdamagmo la ketdin ti Serna’s Tours and Travels. Isu ti manedier.”

Nagtung-edak.

Sineniasan ni Beth ti serbidor ket nagbilin iti mainum.

β€œBagik met,” kinunana idinto nga inruarna ti petakana manipud iti bagna sa nanglapsut iti nabukel a sangaribu.

β€œDinak koma kagura,” kinunak. β€œNagtarayka kadi iti balayyo?”

β€œPagkunaam?”

β€œDakkel a kantidad ti iggemmo. Panagkunak, linibasmo nga innala dayta.”

β€œIdiay balay, saanko a parikut ti kuarta. Mapaadda amin a kayatko. Insaganaak daytoy a rabii. I want to taste the nightlife this Christmas!”

Diak nagtimek. Minatmatak ni Beth.

β€œRabiin,” nakunak. β€œDidaka kadi biroken iti balayyo?”

Apagdarikmat a nayurit ti liday iti mata ni Beth. Ngem immisem idi agangay. β€œI’m a big girl now. Sika, natalianka kadi?”

β€œMaaramidko ti kaykayatko,” bimmara ti pispisko. β€œNo kayatmo, patnaganta!”

β€œRight! Rabiita, agrambakta ketdi!”

Pimmallailang ti White Christmas ni Bing Crosby.

β€œAgsalata,” kinuna ni Beth. β€œLet’s enjoy the night!” Timmakder sanak ginuyod nga impatnga iti salonan.

Saan a nagkitakit idi awidek. Nagdennes ti barukongmi.

β€œBeth, manon ti nangibaga a napintaska?” nakunak.

β€œMaikamanoakon a nangibagaam dayta?” imbales ni Beth.

β€œSiksika pay laeng.”

β€œSika pay laeng met ti nakangngegak,” naggarikgik ni Beth.

Immadalem ti rabii. Immarimbangaw ti salonan. Iti ruar agkarabettaken dagiti rebentador.

Nagbilinak manen iti mainum. Napuskolen ti rupak. Napungay metten ti mata ni Beth. Mangrugin a ngalngalenna ti timekna.

β€œLet’s try another place,” insingasingko. β€œAdda ammok a napintas a disso. Awan makaisturbo kadata.”

Iti kotse, agdaydayyeng ni Beth a nagsadag iti abagak. Sumuknor iti agongko ti ayamuomna.

Napankami iti Paradise Inn. Natiliwko ti amak kadagiti mata ni Beth idi umulikamin iti maikadua a kadsaaran ti pasdek. Ngem idi agangay, kinutina ti abagana.

Linuktak ti Room 201-B. Nagmattider ni Beth iti ridaw idinto nga impalawlawna ti panagkitana iti uneg. Madamdama, imbaltogna ti bagina iti katre.

Nagtugawak iti pingir ti katre. Napatilmonak idi mataldiapak ti agar-arimasa a bibigna.

β€œA-apay a kasta ti panangperrengmo kaniak?” kinuna ni Beth.

β€œNapintaska, Beth,” nakunak.

β€œReally?” naggarikgik.

Saanakon a nakateppel. Naginnagekkami iti napaut.

Ngem rimmuk-atak ta naapgad ti naramanak.

β€œAgluluaka!” nasdaawak.

β€œS-sige, ituloymo,” nakuna ketdi ni Beth ket immarakup kaniak.

Ngem nasebseban ti tarigagayko. Pinatangadko ti timid ni Beth. Inliklikna dagiti matana.

β€œDimo pagayatan daytoy, saan kadi?”

Saan a simmungbat. Pagammuan, naburaken ti luana.

Binay-ak a nagsangit iti abagak.

β€œI’m sorry,” pinunas ni Beth ti luana. β€œPinadasko ngem diak gayam maitured.”

β€œDika maawatan.”

β€œNaiget dagiti dadakkelko. Masiputan amin a tignayko. Diak makaruar iti balay nga awan ti pammalubosda ken awan ti manguyog kaniak. Awan panagtalekda kaniak. Kayarigak ti kristal a napalalo ti panangannadda. Diakon nakaibtur ket inkeddengko a busoren ida. Inkarik nga itedko ti kinababaik iti lalaki a surotak tapno madadaelen ti masakbayak. Ngem diak gayam maitured.”

Nabayag a diak nakatimek. Agpadakami gayam iti panggep!

β€œAgsukatkan,” nakunak.

β€œDinak kagura?”

β€œAgyamanak ketdi ta nasarakanka. Maamirisko itan a di marisut ti biddut babaen ti sabali a biddut.”

Immulogkami. Sinabatnakami ti naragsak a rupiki dagiti kampana ken dagiti agsasallupangen a ranipak dagiti rebentador ken sagawisiw dagiti maipatayab a luses.

β€œOkey kenka no agkuyogtan a mapan makimisa?” inamadko ken ni Beth.

Nagtung-ed ni Beth idinto a nakarangrangrang dagiti matana a nangpallilit kaniak.#