Ayat ti Isangbay ti Paskua

Sarita ni Salvador A. Espejo

(Umuna iti dua a paset)

NANALPAAK ti ridaw nga inrikepko. Ngumayemngemak a nangpaandar iti kotse. Imbaddekko ti siliniador ket simmiag ti kotse a rimmuar iti inaladan.

Kasda la aso ken pusa! naingayemngemko. Indagdagsenko nga imbaddek ti gasolinaan. Iti pagpikoran, dandani napadalapusak ti maysa nga agtutubo. Binugkawannak. Insanudko ti kotse. Alisto ti agtutubo a timmaray idi makitana a sinublianak.

Insikkok iti Quezon Avenue. Linabsak ti Vigan City Commercial Complex. Nakaranraniag iti tiendaan gapu kadagiti nadumaduma ti marisna nga agsilaw-agiddep a dekorasion. Manipud kadagiti pagtagilakuan, tumtumpaw dagiti pamaskua a kanta. Tumuyutoy dagiti tao iti bangketa. Tumtumpaw dagiti nasarangsang a katawada. Kaaduanna ti nakaigpil iti sagut.

Nairut ti panagkitem ti bibigko idi umassibay manen iti panunotko ti pinanawak a buya. Bisperas ti Paskua ngem agsubsubang ketdin da Papang ken ni Mamang!

Inserrekko ti kotse iti Rivero Subdivision. Impaigidko ti kotse iti sanguanan ti bunggalo a napintaan iti nakusnaw nga asul. Nagbosinaak. Madamdama, rimmuar ni Marc.

β€œLumugankan ta adda papananta,” kinunak.

β€œInodta?”

β€œIti Impierno!”

β€œPagustuanka, lakay,” limmugan ni Marc. β€œKalkalainganna, maladaw a sumangpet da Papang ken Mamang. Itay pay la a nakamagmaga ti karabukobko.”

Insardengko ti kotse iti abay ti Impierno. Immunegkami. Manmano ti agiinum. Iti nagsulian, agraraed ni Alicia Keys.

Nagorderak a dagus iti uppat a serbesa ken pulotan.

β€œPagsiddaawennak, lakay,” kinuna ni Marc. β€œDika umin-inum ngem ita….”

β€œKursonadak.”

β€œAdda kinaguram β€˜diay balayyo, β€˜nia?”

Intanguapko ketdi ti basok. Nayuged ti pait iti karabukobko.

Naalikuteg ni Papang iti babai. Nasukalan ni Mamang nga adda ikabkabbalayna. Idi simmangpet ni Papang, kinumpronta ni Mamang. Pinanawak ida nga agrirriri idinto a Bisperas ti Paskua.

Ngem no dadduma, pabasolek ni Mamang. Iti la madiongan ti ayuyangna. Manmano a madatngan ni Papang iti pagtaenganmi.

β€œAnia ti kinaguram iti balayyo?” inamad ni Marc.

β€œDagiti dadakkelko. Kagurak ida!” Naem-emak ti bibigko. Narakrak met laengen ti pagtaenganmi, rakrakek metten ti masakbayak!

β€œKayatko ti tumulong.”

β€œDinak matulongan.”

β€œPaskuan, lakay. Ayat, saan ketdi a gura ti agumok koma iti barukongtayo.”

β€œKasano nga agumok ti ayat no timmayab ti talen-talek iti pagtaengan?”

β€œDika maawatan.”

β€œBay-amon,” nakunak. β€œUminumta ketdi.”

Nagorderak manen iti mainum. Madamdama, pumuskolen ti rupak. Nalabbasit metten ni Marc.

Nagkatawa dagiti dua nga agiinum a lallaki iti makannawanmi. Nasiputak ti itataliaw ti nakuttong kaniak. Kellaat nga immulo ti darak.

β€œApay a kuskusilapannak?” imbugkawko.

Naklaat ti lalaki. β€œDika met kuskusilapan, brod,” insungbatna.

β€œKayatmo ta bettakek β€˜ta rupam?” linengngesko ti botelia. Tumakderak koma ngem inggawidnak ni Marc.

β€œAgtalnaka, lakay,” kinunana. β€œNapudot unay ti ulom.”

β€œIbbatannak ta ikkak iti pagnakmanna!”

Immasideg ti akinkukua. Pinagkappianakami. Pimmanaw dagiti kinaririk kalpasan ti panagbayadda.

Kinita ni Marc ti relona. β€œAlas siete gayamen,” kinunana. β€œAgawidtan.”

β€œKayatko pay ti uminum.”

β€œHuston. Masapuldak β€˜diay balay. Ammom metten, tunggal Paskua, adda sagana ni mamang a pagsasanguanmi.”

β€œAnia pay no dika maigawid,” diak nailinged ti luksawko.

β€œDumagaska pay,” inyawis ni Marc idi maitulodko. β€œDitoykan balay a mangpalabas iti Paskua. Inton bigatton ti panagawidmo. Nakapagkinnaawatanton da Papang ken Mamangmo.”

β€œInton maminsanen,” insungbatko.

β€œAgawidkan. Lipatemon ti guram kadagiti dadakkelmo. Pamaskuam kadakuada.”

Kinutik laeng ti abagak. Pinasayagko ti lugan. Tinarengtengko ti Quirino Boulevard. Insikkok iti Dahlia Street. Nagbosinaak iti batog da Benjie. Rimmuar ti balasitang a babaonenda.

β€œAwan ni Manong Benjie, kuya,” kinunana. β€œNagkukuyogda kada dadi ken mamina a nakimisa itay malem. Agtarusda kano idiay Caoayan a mangsarabo iti Paskua iti balay ni Ate Carol.”

Nagtung-edak laengen sako pinasiwet ti kotse. Nagpaamianannak. Awan masnop a pagturongak. Diak kayat ti agawid.

Imparadak ti kotse iti abay ti Greenfields. Ngem saannak a bimmaba. agsasarunon dagiti agranipak a rebentador iti sanguanan ken sikigak.

Dimsaagak. Bimmallasiwak iti kalsada. Nagturongak iti Plaza Salcedo. Adun dagiti nakatugaw iti aglawlaw ti dan-aw, ur-urayenda ti panangrugi ti pabuya ti Dancing Fountain. Kaadduanna dagiti sangsangaili a panggepda a sarabuen ti Paskua iti Vigan City.

Nariknak ti makapasalibukag nga apros ti pul-oy-Paskua iti rupak. Ngem saan a timmalinaay ti riknak.

Nataldiapak ti babai a nakatugaw iti sirok ti mangga. Agmaymaysa. Kalapati? Wenno adda met dagensenna a kas kaniak?

Impusotko ti bagik iti sementado a pagtugawan. Imbakalko ti panagkitak iti dan-aw. Tumtumpaw ti garikgik dagiti ubbing nga agkikinnamat iti aglawlaw ti nakarangraniag a krismas tri iti sanguanan ti city hall. Labaslabasandak dagiti agkikibin nga asmang. Nakaaapal ti ragsakda.

β€œMabalin ti makikatugaw?”

Tinangadko ti nagtimek. Ti babai a nakatugaw iti sirok ti mangga.

β€œApay ketdin a saan?” nakunak idinto a pinasikigak ti pakabuklanna. Agkataebkami iti pattapattak a tawenna a duapulo. Napudaw. Adda pamuyaanna. Kasla natubtubay ti pammagina a di nabaelan nga inlemmeng ti pangipeten a pantalonna a maong a naasmangan iti nakipet a puraw a tisirt. Langana ti sabong a tartaripatuen ti nadungngo nga ima.

β€œSiak ni Beth Arista,” nagtimek ti kaab-abayko. β€œSika?”

β€œRonald… Ronald Castro.”

β€œAwaganka iti Ronnie, okay?”

β€œSika ti makaammo.”

β€œLibreka kadi ita nga agpatnag, Ronnie?”

β€œApay kadi?”

β€œMasapulko ti kaduak. I want to be happy this Christmas.”

(Maigibusto)