TAGUDIN, Ilocos Sur – Nalmes ti maysa a babai bayat ti panaglibasna kadagiti nangkamat kenkuana a polis kalpasan ti panagtakawna iti maysa a balay iti Barangay Dacutan, ditoy nga ili idi bigat ti Oktubre 11.
Nabigbig ti nalmes a ni Aurora Lopez Pagaduan, 48, naasawaan, ken residente iti Barangay Las-ud, Tagudin, Ilocos Sur ket narekobre a mapapati a tinakawna iti balay ni lilia Mina Saliandra, 74, balo, ken residente iti Barangay Dacutan, ti nasao met laeng nga ili.
Naammuan iti inbestigasion dagiti polis a mapapati a nanglimlimo ni Pagaduan a maysa nga ahente ti maysa a life plan ket idi pinastrek ti baket, tinutokan ti suspek iti kutsilio sana pinarautan dagiti ima daytoy ken kinaluban ti bibigna sana pinorsar a linuktan ti kabinet sana kinurimes dagiti balitok nga alahas nga agbalor iti sumurok-kumurang P45,000 ken Rolex a relo.
Ngem kellaat a simmangpet dagiti kabagian ti baket ket idi nakitada a nakagalut daytoy, kinamatda ti suspek.
Nakipagkamat dagiti kalugaran ti biktima ket maipiskotda koman daytoy ngem di kayat ti suspek ti patiliw isu a bimmallasiw iti waig nupay adalem a puon ti nakalmesanna.
Idi maalaw ti suspek, naitaray iti Tagudin General Hospital and Capllariasis Center ngem indeklara ti doktor a nangatendar kenkuana nga awanen ti biagna.
Narekobre iti makinsango a bulsa ti pantalon ti suspek ti relo ken assorted nga alahas a tinakawna ken ni Saliandra.
Naipan ti suspek iti puneraria para iti pannakaautopsiana ngem saan nga impalubos ti asawana.
Mapapati a napilitan ti suspek a nagtakaw agsipud ta awan pagbayadna iti utangna iti TSPI ken card lending agency ken para iti tuision ti anakna.#