Babai, biktima iti robbery-hold-up

CAOAYAN, Ilocos Sur – Kitkitaen ti kapolisan ti anggulo a kalugaran met laeng ti biktima wenno taga-kaparanget laeng a barangay ti nangisayangkat iti robbery-hold-up idi rabii ti Agosto 5.

Gapu iti butengna, sa la nagreport iti polis iti kabigatanna ni Elaine Atinaja y Badua, 42, naasawaan, ken residente iti Barangay Naguillian, ditoy nga ili a hinold-ap ti maysa a lalaki idi agarup 10:15 ti napalabas a rabii.

Segun iti biktima, iserrana koman ti tiendana idi immasideg ti maysa a lalaki a nakahelmet ken nakaaruat iti nangisit a diaket ket pinaturonganna ni Atinaja iti di ammo ti kalibrena a paltog sana insenias nga iyawat ti biktima ti iggemna a pouch.

Apaman a naiyawat ni Atinaja ti pouch, naglibas ti di nabigbig a suspek iti daya a direksion idinto a dagus a simrek ti biktima iti balayda gapu iti butengna.

Agdagup iti P20,000.00 ti naggian iti bag, segun iti biktima.#