Babai a drug personality, napapatay iti sango ti balayna

VIGAN CITY – Sabali pay a babai a drug personality ti inwalang dagiti armado a tattao a riding in tandem sadiay Barangay Purok a Bassit ditoy siudad idi agsapa ti Septiembre 26.

Inreport ni Barangay Chairman Reynaldo Natividad a maysa a Florybel Argallon Paa, 33, naasawaan, ken residente iti nadakamat a barangay ti pinaltogan dagiti suspek a nagkalubbon iti motorsiklo.

Kas maibatay iti inbestigasion dagiti nagresponde a polis, idi agarup 7:30 iti dayta a bigat, magmagna ni Argallon iti sango ti balayda idi pinaltogan iti sumagmamano a daras dagiti di nabigbig a kriminal a nakaaruat iti nalabaga a helmet a nakatiruan ti nadumaduma a paset ti bagina.

Indeklara ni Dr. Gail Ganawit, duty City health officer ti siudad, a dead on the spot ni Argallon.

Nakarekobre dagiti inbestigador iti nakapasamakan iti pammaltog iti tallo a kapsula ken lima a buli manipud iti cal. 45.

Madama ti panagimbestiga dagiti polis iti motibo iti pammapatay. Ngem maysa ni Argallon a drug personality a surrenderee ken nakalista a top 2 iti drug watch list ti kapolisan ti Vigan.

Kabayatanna, nasuroken a dua a lawas kalpasan ti pannakapapatay ni Atty. Melver Tolentino y Garace, awan pay ti natiliw ti kapolisan a suspek.

Ngem iti agtultuloy a panagimbestiga ti kapolisan, naammuan a dagiti sugatna iti tianna ti nakagapu iti dagus nga ipapatay ti biktima.

Kas maibatay pay iti autopsia nga inwayat ni Dr. Sheilah Mapalo, Medico Legal Officer II ti National Bureau of Investigation, iti bangkay ni Tolentino, narekobre iti tallo a fragments ti bala manipud iti di pay ammo a calibre ti paltog iti uneg ti bagi ti biktima.

Maipalagip nga idi malem ti Septiembre 15, bayat ti pannakagasolina ti Isuzu Sportivo (WDY 789) a lugan ni Tolentino iti Shell Gasoline Station sadiay Barangay Sta. Monica, Magsingal, dua a nakakallugong ken nagaruat iti nangisit a diaket a lalaki a nagsakay iti nangisit ken puraw a motorsiklo ti kellaat nga immasideg sada pinaltogan iti namin-adu a beses ti abogado.

Segun iti mapagtalkan a source, adda dagiti kaso iti droga nga iniggaman ni Tolentino iti kallabes.

Kinuna ni Mapalo a maruk-atan ti kumpleto nga autopsia ken ni Tolentino kalpasan ti dua a bulan.#