Babai, ginandat a bagsolen ti kalugaranna

NARVACAN, Ilocos Sur – Mapapati nga arak ti nanginpluensia iti suspek a manggandat a mangbagsol iti kalugaranna sadiay Barangay Quinarayan, ditoy nga ili idi agsapa ti Oktubre 15.

Segun iti report, idi agarup 7:30 ti agsapa ti nadakamat a petsa, nagturong ti suspek a ni Angel Raneses y Antolin, 52, naasawaan, iti sango ti pagtaengan ti kalugaranna a ni Aida Castro y Antolin, 54, naasawaan, ket prinobokarna a rummuar.

Iti butengda, napan ti biktima ken ti asawana iti balay ti barangay captain ngem sakbay a makadanonda, naasitgan ida ti suspek ket binunotna ti patademna sana binagsol ti babai ngem nakalisi daytoy.

Naginnagawan ti suspek ken ti asawa ti biktima ti patadem ket nabaelan ti naud-udi a dinis-arma ti suspek.

Naikustodia ti suspek iti police station para iti umisu a disposision.

Nakainom ti Raneses idi ginandatna a patayen ni Castro. Saan a nailanad iti blotter no apay a ginandat ti suspek a bagsolen ni Castro.#