Footer

Babai, nabagsol iti burger stand

SINAIT, Ilocos Sur – Natay ti maysa a babai nga agpapaay iti maysa a burger stand gapu kadagiti sinagrapna a bagsol idi parbangon ti Disiembre 14.

Pimmusay iti Corpuz Clinic and Hospital, Sinait, gapu kadagiti sinagrapna a bagsol ni Rymie Yadao y Gascon, 34, naasawaan, Big Mak Burger, Inc., van personnel, ken natibo iti Barangay Resurreccion, San Juan, Ilocos Sur ngem agnanaed iti Barangay Sta. Cruz, ditoy nga ili.

Iti inisial a report ti polis, napasamak ti pammagsol idi agarup 2:10 ti parbangon ti nadakamat a petsa bayat nga agpapaay iti Big Mak Burger stand.

Nagresponde dagiti polis apaman a naawatda ti pulong ti maysa a Rowena Ines y Yago,38, naasawaan, agpapaay iti Frank’s Burger stand nga asideg iti Big Mak.

Nagsagrap ti biktima kadagiti sugat iti barukong ken makannawan nga imana nga isu ti impatayna bayat ti pannakatamingna iti ospital.

Saan a narekobre ti armas a naaramat iti pammagsol ken di pay ammo ti motibo ti insidente.#