Babai, nadukotan iti pagtagilakuan

CANDON CITY – Maysa a misis ti nagbalin a biktima dagiti mannipdut bayat ti kaaddana iti maysa a department store ditoy siudad itay nabiit.

Nagpulong iti polis ni Joy Celyn Macabeo, 40, residente iti Poblacion Norte, Sta. Maria, Ilocos Sur,  a nasipdut ti walletna a naglaon iti P7,000 ken  nadumaduma nga IDna bayat ti panaggatangda nga agiina iti Lucky 99 Store ditoy siudad.

Kas maibasar iti pulong ti biktima, nadlawanna nga adda dagiti babbai a nangsarsaruno kadakuada bayat ti kaaddana iti pagbayadan ket dagitoy ti suspetsana a nangdukot iti petakana.

Di nabigbig dagiti babbai a nangsipdut iti petakana.#