Babai, nakasuan iti robbery with physical injury

BANTAY, Ilocos Sur – Robbery with physical injury ti naikaso iti maysa a babai maigapu iti panagtakawna iti pagtaengan ti maysa a balo a baket ken panangdangranna iti daytoy a puon ti nakayospitalanna.

Nakasuan iti robbery with physical injury ni Arlene Jacob y Borje, 29, separada, ken residente iti Barangay Labut Norte, Santa, Ilocos Sur iti provincial prosecutor’s office iti Vigan City.

Iti report manipud iti Bantay police station, naduktalan ti panagtakaw idi nagusisa ni Fatima Ricamora y Foronda, 43, idi malem ti Septiembre 9 ket naduktalanna ni Anastacia Jao y Pilot, 81, balo, ken residente iti Barangay Zone I, ditoy nga ili, a nadigos iti bukodna a dara iti uneg ti pagtaenganna.

Segun iti biktima, agug-ugas iti pinggan idi rabii ti Septiembre 8 idi adda immasideg kenkuana manipud iti likudan a nangtagbat ken nangmalo kenkuana babaen ti steel pipe iti sumagmamano a daras ken nangkurimes kadagiti assorted nga alahas ti biktima.#