Babai, napaay a nangitaray sinikuatna a wallet, selpon

VIGAN CITY –  Natiliw ti maysa a babai iti akto a panangitarayna iti sinikuatna a petaka ken selpon ti maysa a tindera iti uneg ti simbaan ditoy idi malem ti Agosto 14.

Segun iti report manipud iti polis, bayat ti panaglako ni Rosita Quilda y Follante, 36, naasawaan,  iti religious items iti puestona iti uneg ti Vigan Metropolitan Church iti dayta a malem, inasitgan ken kinapatpatang ni Elizabeth Tenorio Afroilan, 26, naasawaan, ken residente iti Barangay Tay-ac, Bantay, Ilocos Sur, a nagkuna nga ur-urayenna dagiti kaduana a naggapu iti Manila.

Maysa a lalaki ti gimmatang ken  ni Quilda ket idi suplianna koma , natakuatanna nga awanen ti walletna a naglaon iti P4,200.00 ken ti selponna.

Nakita ni Quilda ti suspek a nakaluganen iti traysikel ket pinarana ti lugan.

Insubli ti suspek ti wallet ken ti selpon idinto a nangayab ti on-duty a traffic aide iti polis.

Iti pannakaisurat daytoy adda pay la ti suspek iti kustodia ti polis.#